Dredha u kërkon qytetarëve të dalin sa më herët në votime për shkak të “Giro d’Italia”

Kryetari i Bashkisë Vlorë, Ermal Dredha ka votuar mëngjesin e sotëm në Qendrën e Votimit nr.4471.

Dredha u bëri thirrje qytetarëve të dalin sa më herët në votime, pasi në Vlorë do të zhvillohet sot edhe eventi sportiv Giro d’Italia, dhe disa akse do të bllokohen për këtë arsye.

I pyetur se a do të shtyhet orari i votimit pas kërkesës drejtuar KQZ për shkak të Giro d’Italia, Dredha tha se kjo kërkesë është refuzuar dhe qendrat e votimit do të mbyllen në orën 19:00.

Partia Demokratike – Aleanca për Shqipërinë Madhështore (PD–ASHM) ka reaguar me pas kërkesës së Partisë Socialiste për shtyrjen e orarit të votimit në disa qendra në Vlorë, për shkak të zhvillimit të Giro d’Italia.

Përmes një letre drejtuar Komisionit Qendror të Zgjedhjeve, PD e cilëson këtë kërkesë abuzim të papranueshëm me procesin zgjedhor dhe e konsideron atë si një manovër për të favorizuar propagandën qeveritare në ditët e fushatës zgjedhore.

PD–ASHM kërkon refuzimin e kësaj kërkese duke e cilësuar si një shkelje të parimeve themelore të një procesi të lirë dhe të ndershëm zgjedhor.

gijotina.com/