Një tjetër protestë do të mbahet ditën e sotme për vrasjen e Sabrina Begajt, 23-vjeçares që u vra nga ish-bashkëshorti në Fier. Pas Tiranës, “Platforma Kombëtare për Gratë” kërkon drejtësi për Sabina Begajn në qytetin e Fierit.
Në njoftimin e bërë publik në media paralajmërohet se sot në orën 18:00 në qendër të Fierit do të organizohet protesta ku kërkohet ndëshkim sa më i rëndë i autorit të krimit, Elton Metaj.
“Drejtësi për Sabrinën dhe dhjetëra viktima. Drejtësi për familjet dhe familjarët e tyre, drejtësi në dritë dhe sot protestojmë në qendër të Fierit ora 18:00”, thuhet në njoftimin Platforma Kombëtare për Gratë.
Sabrina Begaj u vra me bukë në gojë nga ish-bashkëshorti i saj, Elton Metaj, ditën e premte duke lënë pas një vajzë tre vjeçare. Problemet mes çiftit kishin nisur prej vitesh dhe dyshja ishin divorcuar. Metaj kishte marrë peng edhe një herë tjetër familjen e Bengës me kallashnikov, ku ndonëse e reja ishte me urdhër mbrojtje, asgjë nuk e ndaloi autorin të kryente krimin e rëndë.
