Kreu i grupit të Reformës në Drejtësi dhe ish-gjyqtari i Strasburgut, Kristaq Traja ka humbur jetën ditën e sotme, jeta, në moshën 66-vjeçare. Traja vuante prej kohësh nga një sëmundje e rëndë dhe sot nuk mundi t’i bënte më ballë kësaj sëmundjeje.
Traja ka qenë drejtues i grupit për diskutimet për ndryshimet kushtetuese për reformën në drejtësi. Ai ka mbajtur edhe pozicionin e gjyqtarit të Gjykatës Evropiane të të Drejtave të Njeriut, si përfaqësues i Shqipërisë. Ka qenë gjithashtu edhe kryetar i Këshillit Drejtues të RTVSH, si dhe ka shërbyer si përfaqësuesi i parë i Shqipërisë në Gjykatën e Strasburgut.
Traja është diplomuar në drejtësi në Universitetin e Tiranës në vitin 1978. Me një eksperiencë 10-vjeçare si gjyqtar në Gjykatën Evropiane të të Drejtave të Njeriut, Strasburg, për periudhën 1998-2008 Traja ka qenë një ndër akademikët më të njohur në Ballkan për të Drejtën Kushtetuese.
Karriera e tij si profesionist në fushën e ligjit ka filluar në vitin 1986, ku ka ushtruar detyrën e specialistit në Sektorin e Studimeve pranë Prokurorisë së Përgjithshme deri në vitin 1991. Ai ka qenë anëtar i Bordit të Kodifikimit në Ministrinë e Drejtësisë gjatë periudhës 1991-1992 dhe Zëvendësministër i Drejtësisë gjatë viteve 1992-1993.
Ai ka qenë gjithashtu anëtar i grupit të punës për hartimin e Kushtetutës shqiptare të vitit 1998. Prej vitit 1994 ai ishte pedagog i së Drejtës Kushtetuese në Fakultetin e Drejtësisë dhe Shkollën e Magjistraturës. Gjatë periudhës 2012-2014 ai ka qenë rektor i Universitetit Luarasi. Gjithashtu, që nga viti 2008 ai ishte avokat në disa studio ligjore prestigjioze në vend. Traja është autor i disa publikimeve dhe përkthimeve në fushën e ligjit.
