“Flamuri i Kuq” këtë herë është ngritur për një tender të kryer nga Drejtoria e Përgjithshme të Pastrimit dhe Gjelbërimit, në Bashkinë Tiranë. Kjo është shenja e riskut të korrupsionit, sipas vlerësimit që bën Open data Albania. Drejtoria në varësinë e kryetarit Veliaj, drejtohet nga Liri Qoshi, e cila ka firmosur prokurimin.
Objekti i tenderit është: ‘Shpenzime për mirëmbajtjen e mjeteve të transportit’ me vlerë 118 milionë lekë (me TVSH). Pra, që të kontrollojë dhe mirëmbajë mjetet e transportit vetëm për 1 muaj, firma përfiton 118 milionë lekë nga taksat e qytetarëve tiranas. Po të kihet parasysh se makinat e kësaj drejtorie janë relativisht të reja, merret me mend se fitimet e firmës së servisit janë të mëdha. Mbase më lirë do t’i kishte dalë drejtoreshës të blinte makina të reja.
Fiton oferta më e shtrenjtë
Për këtë procedurë janë paraqitur 2 oferta, ku “SERVIS – AUTO 2000” sh.p.k kishte ofertën më të lirë me vlerë 91 milionë lekë ose 109 milionë lekë me tvsh. Ishte oferta më e lirë, por u skualifikua me argumentin se nuk kishte dorëzuar deklaratat për vërtetimin e pagesave financiare.
Por duke qenë se “SERVIS – AUTO 2000” sh.p.k kishte ofertë ekonomike, ia vlente që të vihej në dijeni për këtë mangësi, përpara vendimit drastik për skualifikim. Autoriteti Kontraktor e ka për detyrë ta bëjë, por kur futen në lojë interesat private ligji nuk zbatohet. Kështu për në fund mbeti vetëm oferta e bashkimit të operatorëve “BOA SORTE” sh.pk – “SPARKLE 32” sh.p.k, me vlerë 116 milionë lekë (me tvsh).
Megjithëse ishte oferta më e shtrenjtë, duke qenë se nuk kishte asnjë konkurrent përballë, bashkimi i operatorëve e përfitoi kontratën.
Të dyja kompanitë pa asnjë licencë
Por, a kanë kompetencë të dëshmuar pronarët e këtyre kompanive, Rigers Hidri dhe Bashkim Rami, të kryejnë këtë punë? Kujt po i besohet servisi i makinave të bashkisë më të madhe në vend?
Sipas dokumenteve të mëposhtme të nxjerra sot nga QKB, njëra kompani ka licencë vetëm “Shërbime ndërhyrëse higjeno shëndetësore”, ndërsa tjera nuk ka asnjë lloj licencë aktive.
Sipas ligjit, të gjithë subjektet që ushtrojnë veprimtarinë “Autoriparimi i mjeteve rrugore me motor dhe rimorkiove” dhe “Tregtimi i pjesëve të këmbimit të mjeteve rrugore me motor dhe/ose të rimorkiove”, duhet të paraqiten pranë sporteleve të shërbimit të Qendrës Kombëtare të Biznesit për tu pajisur respektivisht me licencën “Autoriparimi i mjeteve rrugore me motor dhe rimorkiove”, me kodin VII.3.B.1 dhe/ose licencën “Shitblerja e mjeteve rrugore me motor dhe/ose e rimorkiove te reja ose të përdorura”, me kodin VII.3.B.2 dhe/ose licencën “Tregtimi i pjesëve të këmbimit të mjeteve rrugore me motor dhe/ose të rimorkiove” me kodin VII.3.B.3 dhe/ose licencën me “Agjenci që trajtojnë praktikat e qarkullimit të mjeteve me motor dhe/ose të rimorkiove” me kodin VII.3.B.4.
Licencimi i këtyre aktiviteteve bëhet në përputhje me kriteret, procedurat dhe afatet e parashikuara në VKM 107, datë 10/2/2016, “Për një shtesë në vendimin nr. 538, datë 26.5.2009, të Këshillit të Ministrave, “Për licencat dhe lejet, që trajtohen nga apo nëpërmjet Qendrës Kombëtare të Biznesit (QKB) dhe disa rregullime të tjera nënligjore të përbashkëta”, të ndryshuar’”.
Pra, drejtoresha e Lali Erit, jo vetëm që ia dha tenderin kompanive me ofertën më shtrenjtë, por edhe pa asnjë licencë.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post