Drejtori i Drejtorisë Hetimore Antimafia të Italisë, Maurizio Vallone, zhvilloi në Tiranë një takim me Drejtorin e Përgjithshëm të Policisë së Shtetit, Muhamet Rrumbullaku.
Vizita është në kuadër të konsolidimit të bashkëpunimit kundër krimit të organizuar.
Diskutimet u fokusuan tek intensifikimi i bashkëpunimit ndërmjet policive të të dy vendeve, për të hetuar në mënyrë të përbashkët, grupet kriminale të trafiqeve, që veprojnë në të dyja vendet, si dhe për të bashkërenduar aksionet policore me qëllim shkatërrimin e këtyre grupeve, arrestimin e pjesëtarëve, si dhe sekuestrimin e aseteve financiare të tyre.
Gjatë takimit, Rrumbullaku theksoi se ky partneritet ka gjeneruar rezultate tejet pozitive në luftën kundër krimit të organizuar, si dhe shprehu bindjen se raportet e bashkëpunimit dhe të miqësisë do të zhvillohen edhe në aspekte të tjera policore, për të garantuar sigurinë e qytetarëve të të dy vendeve.
Drejtori i Drejtorisë Hetimore Antimafia të Italisë vlerësoi aktivizimin e plotë të Policisë së Shtetit, kryesisht gjatë viteve të fundit, për të marrë pjesë, për të koordinuar dhe për të drejtuar operacione të rëndësishme ndërkombëtare në fushën e narkotikëve, në fushat e tjera të trafiqeve dhe kundër krimeve kufitare.
Discussion about this post