Drejtori i Autoritetit Rrugor Shqiptar (ARRSH), Gentian Gjyli, është paraqitur ditën e sotme në Prokurorinë e Posaçme Kundër Korrupsionit dhe Krimit të Organizuar (SPAK), në kuadër të hetimeve që po zhvillohen mbi dyshimet për abuzime me tenderat publikë në sektorin e infrastrukturës.
Kjo është paraqitja e dytë e Gjyli në SPAK, pasi edhe në janar 2025 ai u thirr nga prokurorët për të dhënë shpjegime mbi hetimet që lidhen me tenderat e zhvilluar nga institucioni që ai drejton.
Gentian Gjyli zëvendësoi në këtë post Evis Berberin, ish-drejtorin e ARRSH-së, i cili përfundoi në pranga me urdhër të SPAK, nën akuzat për korrupsion dhe pastrim parash. Sipas hetimeve të deritanishme, Berberi rezulton i përfshirë në gjashë tendera të dyshimtë, tre prej të cilëve në kohën kur drejtonte Drejtimin e Eficencës së Energjisë, dhe tre të tjerë gjatë periudhës si kreu i ARRSH-së. Vlera totale e tenderave të dyshuar për abuzim kap shifrën e rreth 2.2 milionë euro.
Në lidhje me këtë çështje, në pranga janë vënë gjithashtu edhe Valter Begaj dhe Ervis Lami, administratorë të kompanisë DAAM, të cilët dyshohet se kanë përfituar në mënyrë të paligjshme tenderat e shpallur nga ARRSH.
Ndërkohë, edhe emri i drejtorit aktual, Gentian Gjyli, është përmendur në disa raportime mediatike për procedura tenderuese të dyshimta, të lidhura me aktivitetin e Autoritetit Rrugor Shqiptar gjatë drejtimit të tij. Megjithëse aktualisht nuk ka një akuzë zyrtare ndaj Gjyli, paraqitja e tij e përsëritur në SPAK nxit spekulime mbi zgjerimin e hetimeve në drejtim të menaxhimit aktual të institucionit.
SPAK vijon hetimet për zbardhjen e plotë të kësaj skeme të dyshuar korrupsioni në një nga sektorët më të rëndësishëm dhe me buxhet të lartë të vendit – infrastrukturën rrugore.
Discussion about this post