Rosat, ujku, lepuri dhe kafshët e tjera të mbetura në Kopshtin Zoologjik të Tiranës do të ndjekin koncerte mbrëmjeve. Pak javë më parë kryebashkiaku Erion Veliaj bëri rokada të 12 drejtorëve, duke i çuar në drejtori të tjera. Në krye të Drejtorisë së Kopshtit Zoologjik u vendos Ervis Rrahmanin, i cili menjëherë ka nisur të merret me menaxhim fondesh.
Drejtor Rrahmani ka zhvilluar tenderin me objekt “Shërbime me sistem ndriçimi, audio, ledwalle, struktura dhe suport teknik për nevoja të realizimit të eventeve”.
Gara për tenderin është hapur më datë 22 tetor pak ditë para se Muharremi të emërohej drejtor, por procedurat i ka përfunduar ky i fundit.
Më datë 1 nëntor 2024 është mbyllur afati për dorëzim ofertash dhe në të njëjtën ditë është shpallur fituesi. Sipas të dhënave do të blihen ledwall, materiale ndriçim, pajisje për ngritjen e skenës në raste evenimentesh. Nuk sqarohet për çfarë evenimentesh bëhet fjalë, por në total do të shpenzohen 35 milionë lekë. Bashkia ka blerë disa skena e sisteme ndriçimesh dhe skena vetëm muajt e fundit. Për shembull, nëse Zoologjikut do t’i duhej një e tillë, sapo është furnizuar një e skenë tek Piramida që do të përdoret për aktivitetin “Tirana Digjital Nomad Festival” që zgjat vetëm tri ditë. Pra, le ta marrë drejtori këtë skenë dhe të kursejë këto lekë për ndonjë gjë tjetër.
Në fakt në vend që të organizojë koncerte, kafshët kanë nevojë për ushqim të mirë dhe shërbime veterinare, se nuk duken aspak në gjendje të mirë.
Por edhe drejtori i ri e ka mendjen se si të rregullojë ndonjë lek për miqtë e vet dhe jo të kujdeset për kafshët. Prandaj nuk është çudi që i ka shkelur me rregullat e prokurimit.
Në dokumentet e tenderit tregohet që janë paraqitur dy oferta “PIK” sh.p.k dhe “Vebian Muçaj” Person Fizik, ky i fundit është shkualifikuar menjëherë pasi ka patur mungesë dokumentacionesh. Menjëherë pa konkurrencë i është dhuruar kontrata firmës “PIK” shpk, me pronar kryesor Petrit Sarailin
Open Data Albania e ka vlerësuar tenderin me “Flamur të kuq”, që është shenja e riskut të korrupsionit. Për mungesë konkurrence tenderi duhej anuluar, por sistemi i ndriçimit paska qenë urgjent! Në fakt kjo drejtori duket sikur është krijuar për të vjelë para duke përdorur kafshët e Zoologjikut.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post