Një ngjarje e rëndë dhe njëkohësisht e çuditshme ka ndodhur në Itali. Mediet italiane raportojnë se një 15 vjeçar ka humbur jetën, pas një dreke me miqtë e tij në një restorant japonez në Vomero, në Napoli, me një menu fikse për 15 euro. Luca Piscopo, ka humbur jetën pak ditë pasi konsumoi drekën me shokët e tij. Dyshimet e para janë hedhur mbi restorantin, prandaj Prokuroria e Napolit ka hapur një hetim për restorantin dhe ka urdhëruar autopsinë. Për momentin, pronari i restorantit dhe mjeku i përgjithshëm që i dha Lucas një terapi me ilaçe që dukej se funksiononte, janë në regjistrin e të dyshuarve për vrasje .
Sipas medieve, i riu kishte të vjella, diarre dhe temperaturë të lartë, menjëherë pasi konsumoi sushi. Edhe miqtë që po drekonin me të, kishin simptoma të ngjashme, të cilat duket se janë shkaktuar nga bakteri i salmonelës. Por Luca nuk u shërua kurrë. Pas simptomave të para, mjeku kishte përshkruar një antipiretik për temperaturën dhe fermente laktike për çrregullimet e zorrëve, më pas i kishte shtuar një antibiotik. Pas një jave, ethet më në fund ishin ulur dhe situata dukej se po përmirësohej dalëngadalë. Në vend të kësaj, më 2 dhjetor, zemra e tij ndaloi. Tashmë hetuesi kërkon të kuptojë nëse ai ka pasur patologji të mëparshme, edhe nëse familjarët e Lucas pohojnë se “ishte në gjendje të shkëlqyer shëndetësore”, nëse vdekja mund të lidhej vërtet me drekën.
Discussion about this post