Dy të rinj në Lezhë janë vënë nën hetim nga policia për shkak se akuzohen se bënin “drift” me makinat e tyre në mes të qytetit të Lezhës. K. F., 25 vjeç dhe E. B., 22 vjeç, banues në Ishull Lezhë, akuzohen për veprën penale “Prishja e qetësisë publike”.
Pas publikimit të një videoje në rrjetet sociale, ku shfaqeshin dy të rinjtë që rrezikonin përdoruesit e tjerë të rrugës dhe prishnin rendin e qetësinë publike duke kryer manovra të rrezikshme në rrugë, në “Rrethrrotullimin e Katedrales”, policia bëri të mundur identifikimin dhe ndalimin e tyre.
Shërbimet e policisë kanë bllokuar dy automjetet dhe për secilin prej drejtuesve kanë vendosur masën administrative 40.000 lekë gjobë.
Materialet hetimore u referuan në Prokurorinë e Rrethit Gjyqësor Lezhë, për veprime të mëtejshme.
