Paratë për Pallatin e Kulturës “Vaçe Zela” bëhen objekt korrupsioni nga drejtori i Fondit Shqiptar të Zhvillimit, Dritan Agolli. Në maj të këtij viti, Gijotina.com ka denoncuar se Agolli bënte pazar me paratë e këtij kinoteatri në Lushnjë që mban emrin e Vaçe Zelës. Rreth 1.7 miliardë lekë janë prokuruar nga FSHZH përmes tenderit me objekt “Ndërhyrje në muze dhe objekte monumente kulture, rivitalizimi i qendrës së artit Vace Zela”. Ky tender është hapur më datë 15 prill 2024 dhe afati i fundit për paraqitjen e ofertave ishte më 30 prill 2024.
Nga 22 kompani në garë, 21 prej tyre u skualifikuan që në fazën e parë. Në fund, mbi tavolinën e Agollit mbeti zarfi me ofertën e bashkimit të operatorëve “C O L O M B O” sh.p.k &” BAJRAMI N” shpk.
Raportimi i Gijotina.com u pasua edhe nga vlerësimi i Open Data Albania për këtë tender, duke i vendosur “Flamurin e kuq”, që është shenja e riskut të korrupsionit.
Ndërkaq, për këtë tender janë bërë edhe dy denoncime në KPP. Ankesa e parë është bërë nga firma INA shpk. më 23 maj 2024 dhe më pas nga kompania “Zdrava” shpk.
Pas shqyrtimit të kërkesave, KPP iu dha të drejtë ankimuesve duke nxjerrë në pah se tenderi ishte dhënë pa garë dhe kontratat përmbante kritere diskriminuese për konkurrentët e tjerë.
Gjithashtu në vendimin e dhënë, KPP i kërkonte FSHZH, që si Autoritet Kontraktor të bënte rishikimet në dokumentet standarde, që kriteret të hartoheshin komfort ligjit.
Sërish tender pa garë!
Por, Agolli nuk ka respektuar këto direktiva, i ka rënë sërish shkurt. Për të shuar zërat dhe debatet, Agolli ia ka hequr kontratën Nazif Bajramit dhe ia ka dhënë firmës ZDRAVA shpk me drejtues Dashnor Sinanajn, e cila kishte denoncuar shkeljet në vendimin e parë.
Kontratat e re është bërë publike më datë 23 korrik 2024 dhe sërish ka marrë ‘Flamur të kuq’. Agolli sërish nuk ka zhvilluar garë sipas ligjit dhe tenderin e ka marrë firma me ofertën më të shtrenjtë.
Firma e shpallur fituese me ndërhyrjen e KPP, “Zdrava” shpk ka 5 pronarë: Faik Sinanaj, Dashnor Sinanaj, Kastriot Sinanaj, Ylli Zdrava dhe Arben Zdrava. Kompania është favorizuar vazhdimisht nga zyrtarët e tenderave duke marrë mbi 70 kontrata publike vitet e fundit. Nga ana tjetër kjo firmë është skeduar për moskryerjen e punimeve sipas kontratave.
Kujtojmë se në vitin 2022, Kontrolli i Lartë i Shtetit ka zbuluar mashtrimin me volumin e punimeve që ka bërë në një kontratë kjo firmë. Bëhet fjalë për tenderin me “Flamur të kuq” për rikonstruksionin e rrugës së fshatit Çekin dhe zëvendësimin e tubacionit kryesor të Ujësjellësit Çekin në Gramsh’.
Kontrata me vlerë rreth 1 milionë USD është lidhur nga kryetari i Bashkisë së Gramshit në vitit 2020, Klodian Taçe.
Kontrolli i Lartë i Shtetit ka konstatuar abuzime në zbatimin e kësaj kontrate, ku Bashkia Gramsh ka likuiduar punime të pakryera.
KLSH-ja ka kërkuar që të kthehen paratë në buxhetin e shtetit, por ka dyshime të forta se paratë mund të jenë ndarë sipas rolit në këtë përvetësim. Kuptohet pse Agolli e kishte as nën mëngë këtë kompani në tenderin 1.7 miliardë lekë të rikonstruksionit të kinoteatrit të Lushnjës.
Kujtojmë se drejtori i FSHZH, Dritan Agolli, është kallëzuar në SPAK për shpërdorim të detyrës dhe shkelje të barazisë së pjesëmarrësve në tendera. Bëhet fjalë për projektin e “rikualifikimin urban pranë qendrës së qytetit Vlorë, Zona A drejtimi i kullës së Sahatit dhe Sheshi i Flamurit”, i cili ka pasur vlerën e 919 milionë lekëve pa TVSh.
Nga ana tjetër, Prokuroria e Posaçme ka nisur hetimet për kreun e Fondit Shqiptar të Zhvillimit, Dritan Agolli pas publikimit të tenderit të dyshimtë që kap vlerën e rreth 400 mijë eurove.
Bëhet fjalë për tenderin me objekt: Përgatitja e një menuje për projektin e “100 fshatrave”. Fondi Shqiptar i Zhvillimit ka shpallur fitues kompaninë Mascarpone sh.p.k në pronësi të Alfio Rrotanit dhe Endrit Maci person fizik.
Nga verifikimet në Qendrën Kombëtare të Biznesit rezultoi se fituesi i tenderit, Alfio Rrotani punonte si shef kuzhine në një restorant luksoz që është në pronësi të djalit të Dritan Agollit.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post