Kreu i FSHZH i shpenzon fondet e qytetarëve për “ëndrrat” e kryebashkiakut Erion Veliaj. Vetëm në muajt e fundit Dritan Agolli ka hapur gjashtë tendera që kapin vlerën e 26.3 milionë eurove në drejtim të tij. Por tenderi i fundit është me mister. Ditën e djeshme, 15 shtator, në faqen e Agjencisë së Prokurimeve është publikuar një kontratë me objekt “Investime për transformimin e aseteve publike me potencial zhvillimi në modele të standardit më të lartë të zhvillimit, Loti 1 “Parku Multifunksional, Tiranë”. Sipas dokumenteve të këtij tenderi, FSHZH do të japë plotë 579,166,166.60 Lekë dhe operatorët kanë mundësi të paraqesin ofertat e tyre deri në datë 6 tetor.
Çfarë fsheh njoftimi për tenderin?
Në procesverbal përcaktohen kriteret që duhet të plotësojnë konkurrentët, përcaktohen punimet që do të bëhen, certifikatat, licencat që i duhen, të shoqëruara me arsyetim pse janë këto kërkesa. Por, në asnjë nga letrat zyrtare nuk përcaktohet se për cilin park bëhet fjalë? A kemi të bëjmë me rikonstruksion të një parku ekzistues, apo do të ndërtohet një park i ri?
Ku është vendndodhja?
Edhe nëse kemi të bëjmë me ndërtimin e një parku të ri, ligji për prokurimet kërkon që në shpalljen e tenderit të përcaktohet vendndodhja e objektit që do ndërtohet, plani i tij, parametrat, kostot dhe harku kohor sa do të zgjasin punimet për këtë projekt. Por, në asnjë pikë nuk përcaktohet se në cilën zonë të Tiranës do të ndërtohet ky park, si do të organizohet ai apo detajet specifike, por vetëm tregohet se projekti emërtohet “DT Turtle Park”. (Park breshkash)
“Qëllimi: Rritja e nivelit të kënaqësisë së banorëve…”
Teksti i FSHZH-së për këtë tender, duket se është bërë nga stafi i Veliajt në Bashki se ka vetëm fjalë të bukura që u drejtohen fëmijëve, që ata të mos kuptojnë se Lali Eri po zhduk 600 milionë lekë. Sipas hartuesve të projektit, qëllimi është “rritja e nivelit të kënaqësisë së banorëve, veçanërisht të fëmijëve”.
600 milionë për një “park breshkash” në kohë krize është një çmenduri që mund ta bëjnë vetëm Veliaj në bashkëpunim me Agollin. Fakti se si do të sigurohen këto para e thellojnë edhe më shumë abuzimin. Në dokumentin e procesverbalit, që shoqëron kontratën e tenderit, përcaktohet se shpenzimet për këtë projekt do të financohen nga Programit Operacional 2022-2024 i FSHZH-së, i cili është miratuar në emër të nevojave të komunitetit. Tashmë destinacioni i saktë nuk dihet. Por mësojmë tenderi do të hajë edhe paratë e dy viteve në vazhdim.
“Kjo ndërhyrje është parashikuar të financohet në kuadër të Programit Operacional 2022-2024 të FSHZH-së, miratuar me Vendimin Nr. 225 Datë 23.03.2022 të Këshillit Drejtues të FSHZH. Objektivi i përgjithshëm i ndërhyrjes është: Gjallërimi social kulturor dhe sportiv nëpërmjet transformimit te infrastrukturës me karakter rekreacional duke nxitur frymën komunitare dhe rikthyer ndërveprimin social dhe jetën e shëndetshme ne nivel rajonal dhe lokal”, thuhet në dokument.
Më tutje bëhet me dije se, si pjesë e projektit janë parashikuar ambiente të dedikuara sportive dhe rekreative. Kjo kuptohet nga plotësimi që kërkohet me bazë materiale si lisharës, lojë vertikale ekuilibri, lojë e kombinuar për kacavjerrje, lojë peme basketbolli, lojë paralele, rrëshqitje, lojë me konstruksion druri, elementë plastikë të montuar me vida për ngjitjen në murin e betonit, rrjetë me litarë të kuq mbrapa murit me ngjitje. Pak a shumë si këndi i lojërave tek Liqeni, ku u prenë pemët dhe u betonua bari.
Ndërsa në shtojcën 8 të dokumentit thuhet se, “Impakti që pritet të ketë projekti: Përmirësimi i cilësisë së jetës së banorëve; Rritja e nivelit të kënaqësisë së banorëve dhe veçanërisht fëmijëve”. Nuk e dimë se si mund t’u kthejë kënaqësinë dhe argëtimin fëmijëve Veliaj, ndërsa nuk ka lënë hapësirë publike pa ndërtuar kulla betoni. Mbetet të mësojmë se ku është ky vend përrallash që do të ndërtojë Veliaj! Shpresojmë të mos mbetet në ëndrra dhe në dosje korrupsioni me tendera./ Esmeralda Hida/
©Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post