Aktiviteti i Dritan Agollit si drejtor i FSHZH është ilustrimi i saktë i deklaratës së një deputeti socialist pas fitores së zgjedhjeve në vitin 2013. “Ne nuk do vjedhim në mënyrë kaq flagrante sa këta”. Dhe ja si e maskon Agolli një tender të rëndomtë asfaltimi të një rruge fshati: “Nxitja e ndërveprimit dhe frymës komunitare…”.
Do t’ju linim të mendonit ç’të doni, por këtu luhet me 2 milionë euro, prandaj le ta sqarojmë.
Po flasim për tenderin me objekt “Nxitja e ndërveprimit dhe frymës komunitare, gjallërimi i jetës socio-kulturore në zona me potencial zhvillimi nëpërmjet rrjetëzimit të aseteve publike: Asfaltimi i rrugës Fusha e Çajupit – Topovë, Bashkia Libohovë. L = 8,971m”. Në fakt është thjesht riparimi e kësaj rruge 8 km me gjerësi 3-4 metra.
Është rruga në foton më sipër, që ka nevojë për gërmime, do të bëhen pastrimet e gurëve dhe shkurreve, si dhe do t’i hidhet një shtresë asfalt. Por nuk flitet për asnjë investimet tjetër që supozohet të gjallërojë jetën social-kulturore në këtë zonë.
Edhe bashkia Libohovë që ka përgatitur projektin e ka të qartë se çfarë kërkon, rikonstruksionin e rrugës. Ndërsa Fondi i drejtuar nga Agolli e ka “ngatërruar” objektin e tenderit sikur të ishte projekti i ndonjë OJF-je për fshatrat, që me këtë rast do të përmbante ndonjë takim, disa stenda dhe një koktej në fund.
Rregullimi i kësaj rruge që i shërben një fshati me 500 banorë dhe turistëve, nëse marrin këtë drejtim, sigurisht që sjell gjallëri. Ndërkohë, puna që do të kryhet aty quhet “asfaltim” dhe ka një çmim të caktuar.
Këtu futem në thelbin e asaj që Agolli e ka maskuar. Prokurimi është hapur më datë 15 korrik 2024 dhe deri më datë 31 korrik janë dorëzuar 18 oferta të ndryshme. Pritej të zhvillohej një “garë e fortë” pasi bëhet fjalë për miliona euro.
Fondi limit i përllogaritur nga komisioni i Agollit është 199 012 200 lekë, pa llogaritur TVSH që e shton vlerën 20 %.
Por Agolli duke qenë se e ka të paracaktuar fituesin ka bërë vetëm skualifikimin e të gjithë pjesëmarrëve që iu afruan këtij ‘keku të madh parash’. Kështu, 5 ofertat më të lira që varionin nga 1.2 milionë euro deri në 1.4 milionë euro, Dritan Agolli i zhvlerësoi që në fazën e parë, duke argumentuar se nuk kanë dorëzuar në kohë dokumentet që vërtetojnë se kanë kryer më parë punë të ngjashme.
Menjëherë më pas ka përjashtuar edhe 7 ofertat të tjera për të njëjtën arsye. Janë ofertat më ekonomike, të rregullta në dokumentacionet e tjera, prandaj Agolli duhej të kishte zbatuar atë pikë të ligjit që e detyron Autoritetin Kontraktor që të paralajmëronte firmat për mungesën e dokumentacionit që kishin, në mënyrë që në fazat e tjera të vazhdonte gara e rregullt.
Duke vazhduar aksionin e tij, Agolli për përfitime, në përfundim la mbi tryezën e komisionit vetëm ofertën e dorëzuar nga bashkimi i operatorëve “Shkëlqimi 07” sh.p.k – “Fled” shpk , me vlerë 1.7 milionë euro. Sqarojmë se kjo ishte një nga dy ofertat më të shtrenjta.
Pra, jemi në kushtet ku u skualifikuan pa të drejtë 5 oferta, u zgjodh si fitues propozimi më i shtrenjtë dhe mbi të gjitha është cenuar konkurrenca
Open Data Albania i ka vënë këtij tenderi “Flamurin e kuq”, që është shenja e riskut të korrupsionit. Në përshkrimin e bërë nga monitoruesi, theksohet se “janë skualifikuar të gjithë pjesëmarrësit përveç fituesit” dhe është shkelur kushti, “fituesi nuk është operatori me ofertën më të ulët”
Këtë padrejtësi Agolli e bëri për të shpërblyer vëllain e ish-deputetit Agron Kapllanaj. Ju kujtojmë se firma “Shkëlqimi 07” është në pronësi të Shkëlqim Kapllanajt. Për shkak të qëndrimit të ish-deputetit “kundër Berishës”, mazhoraqnca e ka shpërblyer me tendera me vlerë miliona euro në vepra infrastrukturore.
Kujtojmë se në shkurt 2022, SPAK ka nisur hetimet për kreun e Fondit Shqiptar të Zhvillimit, Dritan Agolli pas publikimit të një tenderi të dyshimtë që kap vlerën e rreth 400 mijë eurove.
Burime nga SPAK, thanë se hetimet për këtë rast kanë nisur kryesisht pas publikimit në media të informacioneve rreth tenderit të zhvilluar nga Fondi Shqiptar i Zhvillimit me objekt përgatitjen e një menuje për projektin e “100 fshatrave”.
Fondi Shqiptar i Zhvillimit ka shpallur fitues kompaninë Mascarpone sh.p.k në pronësi të Alfio Rrotanit dhe Endrit Maci person fizik.
Nga verifikimet në Qendrën Kombëtare të Biznesit rezulton se fituesi i tenderit, Alfio Rrotani punon si shef kuzhine në një restorant luksoz që është në pronësi të djalit të Dritan Agollit, drejtorit të Fondit Shqiptar të Zhvillimit.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post