Dritan Dervishi, aktualisht shef i skautëve të Hellas Veronës, në një intervistë për “Panorama Sport”, e sheh si vendim jo të duhur largimin e Shehit nga klubi Partizani, teksa ka kritika për organikën dhe merkaton.
Dritan, ishte i drejtë shkarkimi i Orges Shehit?
Vendim absolutisht i gabuar. Nuk mund të shkarkohet trajneri kur nuk i ke bërë merkaton që ai kërkon. Mesa kuptoj unë nga jashtë, aty mungon koordinimi nëpërmjet sektorit teknik dhe drejtuesve.
Ku mendoni se çaloi Partizani që nuk arriti objektivat në Europë?
Unë personalisht mendoj se skuadra nuk ishte e kompletuar me lojtarë cilësorë për të arritur rezultatet që dëshiron klubi në Europë.
Zeka, Piloto, Zguro dhe Mintongo. S’duket merkato “As”- ash, apo jo?
Unë nuk kam për qëllim të tregoj mungesë respekti ndaj asnjë lojtari, por gabon kush i afron. Partizani është fanellë që peshon dhe nuk mund të bësh vetëm eksperimente.
Largime si Sota, Atanaskoski, Murataj, Skuka dhe Maget së shpejti. Si do të ndikojnë këto dalje te Partizani?
Nuk është problem kush ikën, sepse gjithnjë me 11 veta luhet. Problem është kush do të afrohet. Dhe unë te Partizani shoh një ngërç total në zgjedhje lojtarësh. Gjithashtu vërej mungesë vullneti për të promovuar lojtarët e sektorit të të rinjve.
Duket sikur tregu i trajnerëve është i ngushtë. Si mendoni se do ta zgjidhë Partizani?
Keni ndonjë këshillë? Nuk është problem trajneri. Ka trajnerë shumë të aftë që janë pa ekipe. Problemi është sesi klubi do ta ndihmojë këtë trajner që do të zgjedhë. Këshillë nuk kam, sepse nuk preferoj të bëj profesorin.
A besoni se në harkun e afro tri javëve Partizani do të ndërtojë një skuadër më të fortë sesa vjet?
Kur sheh që ka ngelur kaq pak kohë dhe lexoj që Partizani ende nuk e ka gati ekipin, është shqetësuese sesi stafi drejtues nuk veproi në kohë për të bërë merkato. Por Partizani ka buxhet dhe mendoj se nuk do të ketë probleme për të marrë lojtarë. Gjithsesi, janë pak vonë.
Partizani kaloi një tur, të tjerat asnjë. Duket sikur futbolli shqiptar po prek fundin. Si mendoni?
Futbolli shqiptar është lart me Kombëtaren. Aty shihet një organizim shumë i mirë i nga FSHF-ja, punohet me plan pune dhe me vizion. Ndërsa në kampionatet shqiptare, sidomos në Superiore, akoma nuk e kanë kuptuar se në çfarë drejtimi duan të shkojnë.
Kur lexoj që në mëngjes janë drejtorë sportivë, pasdite agjentë lojtarësh dhe në darkë përfundojnë trajnerë ekipi, kaq më mjafton të kuptoj se çfarë organizimi kanë klubet tona. Janë shumë pak ato klube që programojnë dhe po organizohen për sfidat që futbolli modern kërkon.
Cilin ekip prisni të bëjë surprizën në këtë sezon?
Surpriza do të jetë Elbasani. Aty po punohet me program dhe mbrapa kanë një qytet që është gati t’i ndjekë në çdo cep të Shqipërisë për t’i ndihmuar drejt objektivave.
Discussion about this post