Driton Kuka ka fituar çmimin e trajnerit më të mirë të vitit në botë në sportin e xhudos. Atij iu dha ky çmim në ceremoninë e të shtunës nga Federata Ndërkombëtare e Xhudos.
Vetë Kuka e bëri publik këtë lajm në një postim në rrjetet social ku shkroi se është shpallur trajneri më i mirë.
“IJF na nominoi! Dhe sonte edhe zyrtarisht fituam titujt e më të mirëve në Botë për 2021! U votuam nga mbarë Bota por populli shqiptar ishte me ne më shumë se krejt! Sa shumë jam sonte i gëzuar jo për veten time, ose nxënësen time, por për çdo shqiptar që ishte me ne këto ditë. Sonte do doja të falenderoj me qindra njerëz për ardhjen tonë në këto nivele. Sylen që më mori si fëmijë nga rruga e më dërgoi në tatamin e judos, gjenerata të tëra të xhudos që s’patën rastin të dëshmohen! Majlindës, Disit e Norës që arritën kulmin! Agronit e Fatosit që çdo ditë me orë të tëra flasim për të ecur tutje! Ekipit tonë që frymon si familje tash e shumë dekada. Të gjithë komunitetit sportiv, mediave që edhe në zhgënjimet në arena sportive ishin me ne! Dhe në fund …o sa mirë me qenë Shqiptar…”,- u shpreh ai.
Theksojmë se Kuka ka trajnuar Distria Krasniqin dhe Nora Gjakovën, të dyja kampione olimpike në Lojërat e Tokios. Përveç tyre, Driton Kuka ka qenë trajner dhe ka ndihmuar edhe atletë të tjerë nga Kosova në këtë sport që të marrin rezultate pozitive edhe në aktivitete të tjera./K.T/Gijotina.com
Discussion about this post