Gjykata e Durrësit ka dhënë masën e sigurisë për dy të arrestuarit e 45.5 kg kokainë të kapur në Portin e Durrësit, brenda kontejnerit me mish pule të ardhur nga Brazili, dhe që ishte e mbështjellë me figurën e filmit të animuar “Goku”.
Gjykata ka lënë në burg pa afat administratorin e kompanisë që porositi mishin e pulës, kosovarin Arben Ferizi. Ndërkohë, është caktuar masa me 18 ditë ndalim për Egert Vargun, me detyrë agjent doganor në Portin e Durrësit, që ishte kontraktuar nga kompania, që kishte porositur mishin. Ky i fundit është këshilltari i kryebashkiakut Erion Veliaj, ndaj ia ka hedhur paq me një masë të lehtë sigurie.
Arben Ferizi dhe Egert Vargu i kanë qëndruar deklaratave te tyre të mëhershme ku Ferizi është shprehur se nuk ka lidhje me drogën. Sipas tyre kompania ka porositur mish pule dhe të gjithë veprimet i kryejnë online dhe në këtë mënyrë nuk kanë nga ta dinë se çfarë ka në kontenierë.
Ferizi ka deklaruar se kompania ka vite që merret me prodhimin e salçiçeve dhe është e suksesshme, prandaj nuk e ka nevojë të implikohet në trafikimin e drogës. Ai deklaroi se kompania nuk ka asnjë lidhje, nuk ka dijeni për praninë e lëndës narkotike në kontenier.
Sakaq Egert Vargu me detyrë agjent doganor ka deklaruar se nuk ka asnjë lidhje me këtë ngjarje. Sipas tij ai ka për detyrë të ndjekë procedurat e zhdoganimit dhe jo të kontrollojë kontenierët.
Discussion about this post