Goditet një grup i dyshuar për shpërndarje droge në Vlorë, arrestohen pesë persona, mes tyre dy shtetas italianë
Një operacion antidrogë i zhvilluar nga Policia e Vlorës ka çuar në arrestimin në flagrancë të pesë personave, të dyshuar për shpërndarje të lëndëve narkotike në plazhe dhe lokale të qytetit.
Sipas njoftimit zyrtar të Policisë, në pranga ranë tre shtetas nga Lezha, të moshave 20, 20 dhe 23 vjeç, si dhe dy shtetas italianë, përkatësisht 42 dhe 37 vjeç, banues në Romë dhe Palermo.
Operacioni policor, i koduar “WEST”, u zhvillua nga Seksioni për Hetimin e Narkotikëve në Drejtorinë Vendore të Policisë Vlorë, nën drejtimin e Prokurorisë dhe me mbështetjen e strukturave operacionale.
Të dyshuarit u ndaluan në zonën e Zvërnecit. Gjatë kontrollit fizik, kontrollit të automjetit që përdornin dhe të banesës ku qëndronin në lagjen “Uji i Ftohtë”, shërbimet e Policisë sekuestruan rreth 700 doza lëndësh narkotike të llojeve të ndryshme, të dyshuara si të destinuara për shitje.
Mes lëndëve të sekuestruara janë “Tusi”, ketaminë, MDMA, kokainë, ekstazi dhe kanabis. Gjithashtu, u sekuestruan një shumë parash, e dyshuar si e përfituar nga aktiviteti kriminal, si dhe tetë aparate celularë.
Nga hetimet paraprake rezulton se të arrestuarit dyshohet se shpërndanin lëndët narkotike në plazhe dhe ambiente të ndryshme argëtimi në qytetin e Vlorës.
Materialet procedurale i janë referuar Prokurorisë për vijimin e hetimeve, ndërsa ndaj të arrestuarve rëndon akuza për veprën penale “Prodhimi dhe shitja e narkotikëve”, e kryer në bashkëpunim.
gijotina.com/
Discussion about this post