Drogë e tritol në makinë/ Arrestohen 2 persona në Kukës, 1 tjetër në kërkim

Dy persona janë arrestuar sot nga policia në Kukës dhe një tjetër është shpallur në kërkim. Në kuadër të operacionit të koduar  “Cooperation”, janë arrestuar P. A., 47 vjeç, banues në fshatin Brekije, Kukës dhe F. K., 36 vjeç, banues në Mamurras, Kurbin.

Ndërsa u shpall në kërkim F. A., vëllai i P. A.

Gjatë operacionit, në hyrje të qytetit të Kukësit, shërbimet e Policisë ndaluan automjetin tip “Benz” me që drejtohej nga P. A., në të cilin, gjatë kontrollit, gjetën dhe sekuestruan në cilësinë e provës materiale rreth 6 kilogramë lëndë të dyshuar narkotike kanabis.

Më pas, gjatë kontrollit të ushtruar në banesën P. A., shërbimet e Policisë gjetën një sasi municioni luftarak, ndërsa në afërsi të banesës së vëllait të tij,  F. A., gjetën rreth 1 kg lëndë të dyshuar eksplozive.

Në vijim të operacionit, gjatë kontrollit të ushtruar në territorin përreth banesës së F. K., në fshatin Dardhas, shërbimet e Policisë gjetën bimë të dyshuara narkotike, që dyshohet se janë kultivuar nga ky shtetas.

Në cilësinë e provës materiale u sekuestruan lënda narkotike, municioni luftarak, lënda eksplozive dhe 2 automjete.

Vijojnë hetimet për identifikimin dhe vënien para përgjegjësisë ligjore të personave të tjerë të përfshirë në këtë veprimtari kriminale.