Një person është arrestuar si autori i dyshuar i ngritjes së dronit mbi ambientet e burgut të Burrelit. Bëhet fjalë për 36-vjeçarin Taulant Ahmetsulaj.
Në një njoftim të shpërndarë për mediat, Policia lokale njoftoi se “pas marrjes së njoftimit se mbi ambientet e IEVP Burrel, ishte konstatuar një mjet inteligjent dron, i cili u neutralizua nga punonjësit e sigurisë së burgut, kanë nisur menjëherë hetimet për dokumentimin e kësaj ngjarjeje”.
“Si rezultat i hetimeve të kryera në bazë të inteligjencës policore, u bë i mundur identifikimi, kapja dhe shoqërimi në Komisariatin e Policisë Mat, i autorit të dyshuar të kësaj ngjarjeje, shtetasi T. A., 36 vjeç, banues në Burrel”, shtuan të njëjtat burime.
Më herët, Drejtoria e Burgjeve, ka shprehur dyshimet se ngritja e dronit synohej nga një grup kriminal me qëllim futjen e sende të paligjshme në burgun e Burrelit.
“Inteligjenca operative e sistemit ka administruar të dhëna të besueshme mbi planet e një grupi kriminal për të futur sende të ndaluara në Institucionin e Ekzekutimit të Vendimeve Penale Burrel. Në përgjigje të kësaj, janë ndërmarrë masa të menjëhershme, duke përdorur teknologji digjitale të avancuar, për të parandaluar çdo përpjekje për realizimin e qëllimeve të tyre kriminale. Droni i kapur nuk përmbante sende të ndaluara, por hetimet tregojnë një tendencë të grupeve kriminale për të marrë pamje nga brenda burgjeve të sigurisë së lartë, me qëllim mbledhjen e informacioneve për veprimtari të mëtejshme të paligjshme”, tha Drejtoria e Burgjeve dy ditë më parë, teksa njoftoi për rastin.
Discussion about this post