Fshati Donofrosë në bashkinë Dimal dikur kishte një shkollë me 600 nxënës. Prej pesë vitesh, godina e shkollës ‘Haxhi Rustemi’ është jashtë funksionit ndërsa në oborr kullosin delet.
53 nxënës të arsimit 9-vjeçar e të mesem, të ndarë në 6 klasa e zhvillojnë mësimin në një ambient të marrë me qira nga bashkia jashtë çdo lloj kushti. Edhe ky shtator i gjen nxënësit e Donofrosës në lokal. Pamjet tregojnë se ndarja mes klasave është bërë vetëm me perde. Drejtuesit nuk lejojnë xhirime brenda ambienteve te shkollës-lokal, megjithatë vete nxënësit na thonë se kushtet janë skandaloze.
“Kushtet janë shumë të këqija. Dëgjohen zhurmat e makinave dhe bagëtive nga rruga. Ndërsa në tualetet e lokalit ku bëjmë mësim kemi gjetur gjarpërinj”, tha një nxënëse e fillores.
E njëjta situatë është edhe për 20 fëmijët e kopshtit, të cilët prej tre vitesh mësojnë në një shtëpi të marrë me qira, pasi ambientet e kopshtit u kthyen në zyra të njësisë administrative.
Banorët e fshatit dhe kryeplaku Shaban Metohu e kundërshtojnë vendimin për mbylljen e shkollës. Ata thonë se plasaritjet në godinë mund te riparohen, ndersa kane një thirrje te drejtpërdrejtë për Ministrinë e Arsimit.
Nga ana tjetër Bashkia e Dimalit thotë se ka mbyllur godinën që pas tërmetit 2019, me vendim të Institutit të Ndërtimit ndërsa ka dorëzuar një projekt në Ministrinë e Arsimit, por financimi për shkollën e re ende nuk është miratuar. /Mimoza Sinanaj/ ReportTV
Discussion about this post