Në konferencën e përjavshme që zhvillon me mediat, ish-kryeministri Sali Berisha tha se nuk është kundër sondazheve, por është e pamundur që të zëvendësojnë votimet.
Ai komentoi deklaratën e kreut të grupit parlamentar të Partisë Demokratike Enkelejd Alibeaj. Ky i fundit, së bashku me mbështetësit, kërkoi që kandidatët të zgjidheshin përmes sondazheve dhe votimeve.
Ish- kryeministri deklaroi më tej se të marrësh përsipër të sondosh për kandidatët në mbarë vendin si standard, duhet së paku të bësh gati 800 mijë deri 1 mln euro.
“Nuk kam asnjë kundërshti për sondazhet, që të jem i hapur. Dy gjëra janë. E para sondazhet nuk zëvendësojnë votimet se po të ishte ashtu nuk do shpenzoheni miliarda euro në botë, por përcaktoheshin me sondazhe. E dyta, të marrësh përsipër të sondosh për kandidatët në mbarë vendin si standard, duhet së paku të bësh gati 800 mijë deri 1 mln euro. Të cilat absolutisht nuk i kemi. Por edhe sikur t’i kishim nuk mundet kurrsesi të barazohet vota me sondazhin. Do të mirëprisja shumë kërkesën që si të bëjmë votën më transparente. Më të sigurt, më të lirë. Por jo si të zëvendësojmë votën me poll-in.
Unë jam skepticist, por nuk më pengon. Ka poll-e që bëhen të zakonshme, konvencionale. E vërteta është që poll-et dixhitale kur bëhen me teknika të sakta ato sot provohen më të sakta. As polle-et dixhitale, as ato konvencionale nuk zëvendësojnë votën. Të themi se hajde t’i bëjmë një modifikim meqenëse statuti thotë atë që duhet ta pëlqejë çdo anëtar dhe mbështetës i kësaj partie, voto thotë statuti, të votohet”, deklaroi ai.
Discussion about this post