‘Ramën do ta rrëzojnë të vetët!’ Duka: Nuk jam për zgjedhje të parakohshme, pasi opozita do kohë për t’u bashkuar

Kreu i PAA-së Agron Duka ka akuzuar kryeministrin Edi Rama se ka prishur rregullat e lojës në politikë duke marrë figura nga kampi kundërshtar. Në Off the Record, ai tha se modeli hungarez nuk është i aplikueshëm në Shqipëri.

“Ky i ka futur duart në opozitë dhe ka shumë. A do thoni ju bravo i qoftë? Po nuk është bravo i qoftë, se prish gjithë rregullt e lojës. Shembulli shqiptar nuk është një lloj si në Hungari se ne kemi pasur raste që kanë dalë individë nga opozita, janë munduar edhe kanë shkuar deri në dy deputetë. Nëse provojmë të njëjtën gjë unë them që s’do kemi rezultat. Kështu që sado të jesh tifoz me këtë Orbanin dhe këdo qoftë, unë s’jam tifoz me ndenj kaq shumë pushtet”, u shpreh Duka.

Sipas tij, rotacioni politik në Shqipëri mund të vijë ose përmes bashkimit të opozitës rreth një figure të re dhe të fortë, ose nga zhvillime të brendshme brenda vetë mazhorancës.

“Nëse ne mendojmë që duhet të dalë një nga opozita, por duhet opozita të bashkohet dhe të nxjerrë një element i cili mund të kthejë, mund të vijë rotacioni. Po pse ka rregull loje këtu që ti e merr e shkatërron opozitën. S’ka ideologji më fare këtu brenda të majtës. S’po gjejmë të majtën. Kështu që unë them që mbase ose opozita e bashkuar do të gjejë një zgjidhje të përbashkët për nxjerrë element të ri i cili mund të sjell rotacionin ose brenda llojit mund të ketë”

Duka u shpreh se nuk i do zgjedhjet e parakohshme, por i bëri thirrje opozitës të bashkohet për zgjedhjet e ardhshme parlamentare.

“As kam menduar ndonjëherë për zgjedhje të parakohshme, as nuk kam thënë ndonjëherë. Unë personalisht as nuk kam thënë dhe as nuk i dua”, tha Duka.

Sipas tij, opozita duhet të bashkohet sepse e kanë provuar që veç e veç nuk kanë nxjerrë në pah asgjë të madhe.

“Nga ky hungarezi duhet të mësojmë këtë: brenda dy viteve ai ka lëvizur në çdo cep të Hungarisë, ka biseduar me njerëzit, i ka dëgjuar hallet dhe ky i dha alternativën. Duhet krijuar kjo lloj fryme edhe në Shqipëri. Opozita duhet të shkojë shtëpi në shtëpi, si ky hungarezi. Ka edhe 3 vite kohë”, tha më tej Duka.