Deputeti Agron Duka, kryetar i PAA-së, ishte pjesë e tryezës së partive të vogla dhe shoqërisë civile, e cila diskutoi mbi reformën zgjedhore. Madje në tryezë u paraqit një dokument me 12 propozime, për të cilat Duka tha se mbase nuk pranohen të gjitha, por të gjithë jemi dakort për listat e hapura dhe votën e emigrantëve.
Në studion e Euronews Albania, Duka tha se do të synohet një sistem ku të paktën fituesi mos shpallet përmes padrejtësive.
“Edi Rama mund të fitojë prapë, por jo të fitojë në mënyrë të padrejtë që të ketë një pushtet që shtyp çdo lloj ideje dhe mendimi që është kundër këtyre.
Kjo po ndodh tani. Ne kemi shkruar 12 pika, këto mbase nuk realizohen të gjithë, por për listat e hapura apo për votimin e emigrantëve janë të gjithë dakord. Atëherë kush po na pengon”, tha Duka.
Sipas tij, ndryshimet në Kodin Zgjedhor u bënë në mënyrë të njëanshme, ndaj dhe ata nuk mund ti rezistojnë kohës.
“Shumica e votuesve shqiptarë kërkojnë me ngulm që të hapen listat, pasi nuk mund të hyjnë në politikë të rinjtë, nëse listat nuk hapen”, tha Duka. Ai tha se kemi një sistem të deformuar, nga i cili vjen edhe korrupsioni në nivel galopant.
Discussion about this post