Deputeti Agron Duka, kryetar i PAA, përmes një postimi në rrjetet sociale, shprehet se do të jetë pjesë e të gjitha nismave opozitare në Kuvend, duke theksuar se ajo duhet të jetë në lartësinë e duhur në të gjitha betejat parlamentare.
Përmes një postimi në rrjetet sociale, Duka thekson se çështjet e brendshme të PD-së i takojnë kësaj partie dhe PAA nuk ndërhyn e as ndikohet.
“Opozita vërtet nuk është në pushtet, por ajo përfaqëson një pjesë të shoqërisë aty dhe për këtë arsye duhet të punojë për intereat e tyre dhe të vendit. Edhe opozita është pushtet dhe si i tillë ai pushtet duhet ushtruar në shërbim të qytetarëve.
Ne mbështesim riorganizmin e opozitarizmit parlamentar, ngritjen e komisioneve hetimore dhe organizmave të tjerë politikë, që kanë për qëllim të frenojnë korrupsionin, që është shndërruar në armikun më të madh të përparimit dhe integrimit të vendit.
Ne nuk do të përfshihemi në mosmarrëveshjet e brendshme të PD-së, por do të jemi pjesë e çdo nisme parlamentare që ka për qëllim pëmirësimin e standardeve të demokracisë, përmes ndryshimit të kodit zgjedhor, hapjen e listave, votën e emigrantëve etj, si dhe luftën kundër korrupsionit, transparencën e kontratave koncesionare etj”, shprehet Duka.
Kryetari i PAA ishte një prej 43 deputetëve opozitarë që iu përgjigjën ftesës së deputetit Gazment Bardhi me qëllim unifikimin e qëndrimit të ligjvënësve kundrejt Qeverisë Rama dhe Kryeministrit.
Discussion about this post