Nga situata e krijuar për shkak të ndërhyrjes politike në zgjedhjet e FSHF-së, Presidenti Armando Duka, do t’i kërkojë Asamblesë së Përgjithshme Zgjedhore shtyrjen e datës së zgjedhjeve. Duka shprehet që kjo kërkesë do t’i shërbej një procesit të rregullt statutor dhe gjithë kandidatëve për të shpalosur platformat e tyre përballë komunitetit të futbollit.
“Komiteti Ekzekutiv i Federatës Shqiptare të Futbollit ka vendosur thirrjen e Asamblesë së Përgjithshme Zgjedhore më datë 2 mars 2022, me një rend dite siç e parashikon Statuti i FSHF-së: miratimin e bilancit financiar, miratimin e buxhetit, miratimin e raporteve të auditorëve të pavarur dhe zgjedhjet për organet drejtuese, për President dhe anëtar të Komitetit Ekzekutiv për katër vitet e ardhshme. Duke qenë dëshmitar të një procesi të ndërlikuar me debate e akuza, por edhe disa vendime gjyqësore, përfshirë dhe atë për Shoqatën Rajonale të Futbollit Tiranë që duhet të respektohen detyrimisht, unë do t’i propozoj dhe do t’i kërkoj Asamblesë që pikën e rendit e ditës për zgjedhjet e organeve drejtuese të FSHF për President dhe anëtar të Komitetit Ekzekutiv, të shqyrtohen në një datë tjetër. Uroj që kjo periudhë t’i shërbej një procesit të rregullt statutor dhe gjithë kandidatëve për të shpalosur platformat e tyre përballë komunitetit të futbollit” – thuhet në kërkesën e Dukës.
Kujtojmë se situata për zgjedhjen e kryetarit të ri të FSHF-së nuk ka qenë e qetë për shkak të ndërhyrjes së politikës dhe konkretisht të kryebashkiakut të Tiranës, Erion Veliaj. Pasi dështoi me çdo metodë të presionit politik për të përjashtuar Armando Dukën nga gara, Veliaj tashmë po përdor Gjykatën e Tiranës për të arritur këtë qëllim. Deri më tani kjo gjykatë ka vepruar në mënyrë aktive dhe në sinkron me qëndrimet që ka mbajtur kreu i Bashkisë së Tiranës.
Discussion about this post