Armand Duka, President I FSHF, u shpreh mbrëmjen e sotme se në dy ndeshjet e mbetura në kuadër të kualifikueseve për Euro2024, kombëtarja kuqezi do të luajë për më shumë se dy pikë.
Në një intervistë në Klan News, Duka tha se nuk kemi pse të bëjmë matematikë, por duhet të luajmë për t’u renditur të parët në grup.
“Ndeshja me Moldavinë është e vështirë, kanë një ekip që në fushën e tyre nuk kanë humbur asnjë ndeshje. Kanë dalë barazim me Çekinë, kanë mundur Poloninë. Por ne nuk kemi pse të bëjmë llogaritë matematike. Një barazim në Moldavi vulos kualifikimin tonë për në Euro 2024, por ne do të luajmë për të marrë më shumë se dy pikë në ndeshjet e mbetura, pasi do të luajmë që të kualifikohemi si kokë grupi”, tha Duka.
Ai tha se politika jonë ka qenë gjithmonë që shqiptarët të luajnë për Shqipërinë, duke shtuar se të gjithë lojtarët, talentet e futbollit, e kanë derën e hapur.
“Kemi kontaktuar lojtarë shumë të talentuar në Itali apo Gjermani, I kemi ftuar dhe do të vazhdojmë ti rikujtojmë se duhet të luajnë për Shqipërinë”, tha Duka.
Lidhur me raportet me trajnerin e kombëtares, Duka tha se “nuk kemi ndonjë klauzolë për rinovimin e kontratës në mënyrë automatike me Sylvinho dhe stafin e tij. Kemi qenë të fokusuar te objektivat dhe natyrisht do të flasim edhe për të ardhmen”.
Presidenti I FSHF ka pohuar se në kuadër të përgatitjeve për Euro2024, kemi vizituar disa qendra ku kombëtarja shqiptare, në rast kualifikimi, mund të stërviten në Gjermani.
“Kam besim se në dy ndeshjet e fundit do të bëjmë më të mirën tonë. Ne kemi bërë përgatitjet tona, do të shikojmë edhe kalendarin se ku do të mund të luajë kombëtarja jonë në rast kualifikimi për të vendosur më pas edhe mbi qendrat ku do të stërvitet, akomodimin etj”, tha Duka.
Discussion about this post