Kryetari i Partisë Agrare Ambientaliste, Agron Duka ka bërë një thirrje për pensionistët, në lidhje me zgjedhjet e 11 majit.
Duka thekson se para bonusit pensionistët duhet të mendojnë për veten dhe fëmijët e tyre.
Në mesazhin e tij në rrjetet sociale, Duka thotë se rritja e pensioneve e thënë nga Qeveria është një vlerë qesharake.
Duka tha se pensionistët meritojnë një pension dinjitoz, në raport me punën e një jete!
Reagimi
Një thirrje e hapur për pensionistët e Shqipërisë!
Të dashur bashkëqytetarë, po ju drejtohem publikisht, së pari si një qytetar i këtij vendi, e pastaj si një politikan.
Për shkak të largimit të të rinjve, grupmosha juaj përbën sot rreth 35% të popullsisë së vendit. Për këtë arsye, ju jeni edhe një “objektiv” i rëndësishëm politik për qeverinë. Me afrimin e zgjedhjeve:
Qeveria foli për rritje të pensioneve dhe vendosi një vlerë qesharake.
Erdhi bonusi i vitit të ri dhe ai i pranverës.
U kujtuan për reformën e pensioneve.
U justifikuan se nuk ka para për rritjen e pensioneve, sepse biznesi privat nuk deklaron pagat reale.
Të dashur pensionistë!
Ju nuk meritoni thjesht një shpërblim sa vlera e një gjeli për festat. Ju meritoni një pension dinjitoz, në raport me punën e një jete!
Edhe nëse qeveria ua jep një bonus, mos ia dini për nder kryeministrit, sepse ato janë paratë e taksave që paguajnë familjarët tuaj!
Kur të shkoni te kutia e votimit, kujtoni se:
Shumë prej jush jetojnë vetëm, sepse fëmijët kanë marrë rrugët e botës për një jetë më të mirë.
Shumë prej jush varen nga paratë që fëmijët dërgojnë nga jashtë për të paguar dritat dhe ilaçet.
Shumë prej jush janë të përmalluar për nipërit dhe mbesat që në shumë raste nuk dinë as shqip.
Dhe çdo muaj, duhet të prisni në radhë denigruese për një abone falas, sepse qeveria do që ju ta ndjeni si një lëmoshë, jo si një të drejtë!
Ndërkohë, “ata lart” që ju i votuat për të qeverisur:
Jetojnë në luks dhe kombinojnë ngjyrën e këpucëve me makinat.
Shpërblejnë njëri-tjetrin me rezorte, hotele dhe vila përrallore.
Dalin në ekrane për të treguar “përparimin” e Shqipërisë.
Ne duhet ta ndalojmë këtë shfrenim abuzimi!
Vota juaj vlen për ju, por edhe për fëmijët tuaj që sot punojnë në ferma e kantiere ndërtimi nëpër botë.
Mendohuni mirë para se të votoni!
Discussion about this post