Vijon të jetë problematike situata e zjarreve në qarkun e Vlorës, kryesisht në zonën e Dukatit, ku ka ende shumë vatra aktive dhe ku është e pamundur ndërhyrja nga ana e zjarrfikëseve, për shkak të terrenit tepër të vështirë në zonë.
Për shuarjen e flakëve janë përdorur mjetet rrethanore nga ana e zjarrfikësve, të cilët janë ngjitur në këmbë deri në majat e larta të zonës për shuarjen e flakëve, por megjithatë situata është tepër e vështirë dhe e papërballueshme.
Në lidhje me këtë situatë të krijuar ka folur edhe Kastriot Bega, Drejtor i Zjarrfikëses Vlorë, i cili shprehet se nuk kanë kapacitetet e nevojshme për të mbuluar gjithë territorin.
Sipas tij, në zonë janë shumë vatra zjarresh aktive, përgjithësisht të qëllimtë nga dora e njeriut, pasi fshatarët e zonave djegin barërat e këqij.
“Jemi vetëm 38 punonjës me gjithë administratën. E pamundur të menaxhohet gjithë territori,” – sqaron Begaj, ndërsa aktualisht situata më e vështirë për tu menaxhuar është ajo në zonën e Dukatit.
Deri më tani janë shkrumbuar 36 ha kullota dhe 1.5 ha pishë e rrallë ndërsa për shkak të terrenit zjarri vijon ende në ditën e 4-t.
Situata është po ashtu e vështirë në fshatin Drithas në njwsinw administrative Shushicë, ku janë shkrumbuar 4 ha tokë pemëtari. Emergjenca civile ende nuk kanë vendim për ndërhyrje nga ajri.
