Sikur të mos kishte marrëveshje para tenderit, Ergest Dule, kryebashkiaku i Konispolit do t’i kursente buxhetit 17 milionë lekë për asfaltin që do t’i hedhë një copëz rruge.
Projektet që zhvillon kryetari Dule po rrotullohen rreth arnimit të rrugicave apo rikonstruktimit të një fasade. Këtë herë bëhet fjalë për tenderin me objekt RIKOSTRUKSIONI I RRUGES ( FABRIKA E VAJIT – FILLIMI I KTHESAVE MALORE), MARKA.
Ky është një degëzim rruge. Siç e shihni rrugicën në foto, duket qartë që është amortizuar për shkak se është lënë pas dore dhe tani për t’i mbushur gropat Dule parashikon të shpenzojë 67 milionë lekë.
Gjithçka që do të bëhet në këtë rrugë 880 metër të gjatë është hedhja një shtrese çakëll aty ku mungon dhe një shtrese asfalti 4 cm. Për kaq punime, koha e përcaktuar e përmbushjes së kontratës është 21 ditë. Si mendoni a mund të bëhet rikonstruksion rruge për 3 javë? Kryetari Dule kështu i hedhka lekët.
Një pyetje tjetër na lind sepse ky tender bëhet menjëherë pasi bashkia bleu asfalt e çakëll nga kompania Kaviljoti për të mbuluar 2 vjet nevojat. Përse duhet që kjo hedhje asfalti (që e quajnë “rikonstruksion”) kur bashkia ka blerë dhe ka gati lëndën e parë, kompaninë Kaviljoti me makineritë e saj për shtrim dhe asfaltim?
Me siguri me këtë çështje do të merret auditimi nga KLSH, por për momentin mund të shohim procedurën e tenderit.
Në fazën e parë kanë aplikuar për këtë tender 3 firma, kur oferta më e ulët ishte prezantuar nga kompania Kalivjoti shpk, me vlerë rreth 50 milionë lekë. Por, Dule këtë ofertë e ka skualifikuar me argumentin se nuk ka paraqitur kontratën e punës me një manovrator. Në fakt, “Kaviljoti” po të donte e merrte edhe manovratorin, edhe tenderin, por disa ditë më parë kishte fituar kontratën 250 milionë lekë nga Dule për asfalt dhe çakëll.
Pra, kryetari ka pasur ndërmend një tjetër kompani këtë radhë. Dhe fill pas “Kaviljotit” është skualifikuar edhe firma tjetër në garë Iliria/D.
Në këtë mënyrë për në fazën e fundit mbeti e vlefshme vetëm oferta e firmës së Simon Çipës, JODY COMPANY SHPK, me vlerë 60 milionë lekë. Epo nëse Dule do kishte respektuar ligjin dhe do të kishte njoftuar ofertën më të lirë për mangësitë që kishte, më pas të vazhdonte garën e rregullt, do ishin kursyer 17 milionë lekë nga buxheti i bashkisë. Një shumë e konsiderueshme parash që qytetarëve mund t’u ktheheshin në shërbime të tjera të vlefshme.
Ndërkaq, Dule i dha përparësi ofertës më të shtrenjtë, madje duke ia liruar rrugën nga konkurrentët e tjerë. Ky tender u vlerësua nga Open Data Albania me “Flamur të kuq” për riskun e korrupsionit.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post