Trajneri i mirënjohur, Shpëtim Duro ka analizuar kampionatin shqiptar të futbollit ku ka cilësuar si favorite për titull skuadrën e Vllaznisë. Analizën e tij ai e nis me sfidën që u luajt ditën e sotme ndërmjet Kukësit dhe Laçit.
Kukësi – “Sot kishte testin e vërtetë duke iu referuar skuadrave kryesore se ka pasur ndeshje me Egnatian e Kastriotin që do te jenë gjithmonë në pjesën e poshtme të klasifikimit. Ky test tregoi edhe oshilacionet që ka Kukësi pa eksperiencë e përvojë. Kjo tregoi që nuk është Kukësi pretendent, ka komplimente se është në vendin e parë por të shohim në vazhdim.
Dueli Partizani-Vllaznia – “Unë pashë lojën, barazimi ishte rezultati më i drejtë, edhe pse Vllaznia ishte pranë fitores. Për atë që dhanë skuadrat në fushë, barazimi ishte rezultati më i drejtë.
Ndeshja mes Teutës dhe Dinamos – “Dinamo ishte ndaj kampiones, ka ndikim psikologjik. Për mua doli e fituar Dinamo, se quhej transfertë përballë kampiones. Ndeshja në momentet më të mira të minutazhit e kishte Dinamo, por kishte edhe Teuta. Mund ta fitonin të dyja, kështu që barazimi ishte ai që i shkoi këtij takimi.
Kam dëgjuar që Teuta është më e fortë se sezonin e kaluar. Nuk e shoh më të fortë se ka qenë një element i rëndësishëm, protagonisti kryesor që fitoi titullin, Dejvi Bregu. Ndoshta në 4-5 ndeshje që i ka fituar me 1-0 me pikë të dhuruara nga Bregu, i mungon një lojtar i cili ka qenë vendimtar për titullin”.
Derbi Dinamo-Partizani – “Shumë bukur, i kam përjetuar vetë kur kam qenë futbollist. Sigurisht Partizani-Tirana është më i zjarrtë, por Partizani-Dinamo ka qenë kryesor prej 60-70 vitesh. Do ta ndjek me vëmendje. Do të jetë delikat për Partizanin sa i përket pikëve. Por të jep moral për vazhdimësinë e kampionatit”.
Forma e Tiranës – “Tirana zhgënjeu në sezonin e kaluar. Nuk arriti as objektivin minimal, Europën. Është një humbje e madhe, edhe nga aspekti financiar. Kur nuk arrijnë në Europë, kanë humbje të mëdha, edhe për emrin. Këtë vit ka bërë investime, ka skuadër shumë të mirë, lojtarë si Limaj e Totre që i kam drejtuar. Sinqerisht them që Tirana ka gabuar më shumë nga të tjerët, duke pasur kundërshtarë që luftojnë për pjesën e poshtme të tabelës, ka gabuar shumë dhe tani është futur në presion. Ka ndeshje të rëndësishme që pret Laçin, janë dy skuadra në presion nga të dy krahët. Çdo gabim i tyre dhe nis shkëputja e grupit të sipërm të tabelës. Gjëja më e bukur është që është kthyer Seferi me gola. E njoh që 18 vjeç në Maqedoni, është cilësor. Nuk është lojtar tipik goli, por kur nis të shënojë është i rrezikshëm. Megjithatë, rezultatet lënë për të dëshiruar te Tirana”.
