Ditën e sotme banorët e pallatit në lagjen nr. 12 të qytetit të Durrësit, janë mbledhur në shenjë proteste përpara bashkisë së qytetit, pasi punimet në pallatin e tyre janë ndërprerë prej më shumë se 2 muajsh.
Edhe pse rreth 2 vite nga tërmeti tragjik, banorët e pallatit pranë tregut të vogël industrial, vijojnë të enden nëpër dyert e institucioneve, pa marrë një zgjidhje konkrete për fatin e pallatit të tyre.
Pallati i cilësuar nga akt-ekspertiza me nivel dëmtimi DS4, në qershor të këtij viti iu nënshtrua procesit të rikonstruksionit, i cili u ndërpre në muajin gusht pa asnjë njoftim.
“Ne kemi bërë kërkesë drejtuar edhe kryetares së bashkisë. Banorët kanë qenë edhe më parë në bashki dhe kryetarja nuk i ka pritur. I ka pritur shefi i urbanistikës. Ne duam një shpjegim, sepse sot na kanë thënë që do merrnim një përgjigje me shkrim nga shefi i urbanistikës për të na sqaruar përse janë ndërprerë ndërtimet dhe kur do të fillojnë. Tre katet e para janë komplet të shkrepura. Janë shembur të gjitha tullat edhe ne nuk e dimë fare se çfarë po ndodh. Punimet kanë nisur në 22 qershor 2021 dhe janë ndërprerë në gusht. Tani janë 100 e ca familje që kanë mbetur jashtë që nuk kanë asnjë lloj informacioni se çfarë ndodh në shtëpitë e tyre.”- thotë një qytetare
Problemi thellohet edhe më tej pasi për më shumë se dy muaj , banorëve nuk u janë dhënë as bonuset e qirasë.
“Kërkojmë të dimë, kush është arsyeja e ndërprerjes të punimeve të rikonstruksionit në një kohë që ne kemi përballuar sfidën e tërmetit dhe jemi kthyer në një familje ciganësh. Nuk po dimë a kemi shpresë a s’kemi. Nuk po na jep njeri përgjigje a do vazhdojnë punimet apo jo. Ka 2 muaj që kjo gjendje vazhdon kështu. Përpos kësaj ka dy muaj që bonuset e qerasë nuk jepen. Tani jetojmë ku të mundemi. Nuk e di nëse ka ende banorë që jetojnë brenda.”- shprehet një qytetar tjetër
Edhe pse kryetarja e komanduar e Bashkisë Durrës, Znj. Emirjana Sako, gjatë fushatës zgjedhore u premtoi banorëve zgjidhjen përfundimtare të këtij problemi, sot ajo dhe vartësit e saj i përcjellin 100 familjet e këtij pallati.
Procesi i rindërtimit dhe rikonstruksionit duket se do të mbetet një problematikë e pazgjidhur në qytetin e Durrësit, si një prej qyteteve më të dëmtuara nga tërmeti i 26 nëntorit.
