Banorët e Shkozetit dhe ish-kënetës në Durrës, u duhen të përballen përditë me kanalin e ndotur të ujërave të zeza që kalon në këto zona. Kanali i ndotur që nis në afërsi të urës së Dajlanit pasi përshkruan dy lagje përfundon në hidrovor prej 20 vitesh dhe është kthyer në një shqetësim real për banorët.
Ky kanal më parë ka shërbyer për mbledhjen e ujërave të larta, të cilat shkarkoheshin në hidrovor. Ndërsa në dy dekada e fundit në të shkarkohen edhe ujërat e zeza. Banorët e Shkozetit kërkojnë që autoritetet të ndërhyjnë sa më parë.
“Era është e padurueshme. Disa herë jemi ankuar po s’është bërë asnjë gjë. Të rregullohet sa më parë të mbulohet. Është sëmundje i gjallë është kanal vrasës”- është shprehur një nga banorët. Ndërsa një banorë tjetër thotë se kjo situatë ka që para 20 vitesh.
“Kam 18 vjet që kam ardhur kështu ka qenë këtu. Të bëhen kanalet të futen tubat dhe të mbulohet e do jemi në rregull” – thotë një banor tjetër.
Nga zona e Spitallës deri tek ish-këneta, jetojnë afro 60 mijë banorë, ku në këtë pjesë kalon dhe ky kanal. Për këtë problem, Bashkia Durrës thotë se kostoja e lartë dhe e papërballueshme, është shkaku që nuk ka pasur ndërhyrje. Ndaj dhe nevojitet ndihmë financiare nga qeveria.
