Policia e Durrësit ka arrestuar dy përgjegjësit për sigurinë në fabrikën “Pespa Alumin” pasi ditën e djeshme një person ka humbur jetën tragjikisht në punë.
50-vjeçari me iniciale D. N., dyshohet se është dëmtuar aksidentalisht nga një makineri gjatë punës në ambientet e firmës “Pespa Alumin”. Ai ka ndërruar jetë në vendin e ngjarjes si pasojë e plagëve të marra.
“Në vijim të informacionit të dhënë ditën e djeshme, për shtetasin D. N. që humbi jetën gjatë punës në një firmë për përpunimin e duraluminit, pasi dyshohet se u dëmtua nga një makineri, informojmë se specialistët për Hetimin e Krimeve të Komisariatit të Policisë Durrës, në vijim të veprimeve hetimore për këtë rast, arrestuan në flagrancë për veprën penale “Shkelja e rregullave të mbrojtjes në punë”, shtetasit L. H., 47 vjeç, banues në Durrës dhe G. A., 52 vjeç, banues në Tiranë, përgjegjës për sigurinë në këtë firmë.”- njofton policia.
Sipas të dhënave të Inspektoratit Shtetëror të Punës dhe Shërbimeve Shoqërore, nga Janari deri në muajin tetor të vitit 2024 u raportuan 138 aksidente në punë, prej të cilave 26 me pasojë vdekjen. Një shifër në rritje kjo krahasuar me vitin 2023 ku u regjistruan 32 aksidente me 8 humbje jete. Ekspertët kanë shprehur shqetësim për mos respektim të protokolleve të sigurisë.
Discussion about this post