Është sekuestruar sërish drogë në kontejnerin e kompanisë së bananeve të “Alba Exotic Fruit”, në pronësi të Eduart Dautit. Kjo kompani po thyen rekord në transportin e kokainës në vendin tonë përmes kontejnerëve me banane, kur sasia e kapur sot në Portin e Durrësit është e katërta vetëm në pak muaj.
Në një njoftim zyrtar, policia tha se në vijim të operacionit “Rada” u kapën 7.7 kg kokainë, e ndarë në 8 pako. Kokaina ishte e fshehur në pjesën fundore te kapakët e motorëve frigoriferike dhe vinte nga Ekuadori në llogari të firmës “Alba Exotic Fruit”.
Hetimi u bë nën drejtimin e SPAK, ndërsa operacioni është ende në zhvillim në kontrollin e kontejnerëve të tjerë në Portin e Durrësit. Në muajin korrik është bërë arrestimi në flagrancë i Barjon Gumenit, menaxheri i firmës dhe është shpallur në kërkim administratori i firmës, Eduart Dauti.
Dauti nuk di të ndalet në trafikun e drogës, ku kjo është hera e pestë që në kontejnerët e kompanisë së “Alba Exotic Fruit” gjendet kokainë.
Më herët, më 29 korrik kompanisë iu gjetën dhe u sekuestruan 7.25 kilogramë kokainë po në vijim të operacionit “Rada”. Më 13 korrik në Portin e Durrësit u gjetën dhe u sekuestruan 11 kg e 675, ndërsa 10 ditë më vonë, më 23 korrik u gjetën 6.5 kilogramë të tjera, të cilat ishin fshehur në kontejnerët e po të njëjtës kompani.
Kompania “Alba Exotic Fruit” rezulton e përmendur edhe më parë trafikun e drogës, ku në vitin 2019, në kontejnerët e kësaj kompanie, në Pire të Greqisë u gjetën 137 kg kokainë që u zëvendësua me oriz me GPS nga autoritetet. Për kokainën e ngarkuar në kontejnerët e “Alba Exotic Fruit” në 2019 u arrestuan Altin Myslihaka dhe Ardian Begaj dhe u shpall në kërkim Gentian Malindi.
Policia kufitare po vijon hetimet në port, ndërkohë që operacioni nuk ka përfunduar ende, pasi po kontrollohen të gjithë kontejnerët e ardhur nga vende me risk të lartë trafiku droge.
