Në Durrës problematika me mbetjet vijon duke u bërë çdo ditë e më shumë alarmuese për banorët.
Zonat të cilat rrezikohen më shumë këto kohë janë ato periferike pasi Bashkia Durrës është kujdesur të pastrojë vetëm qendrën duke lënë pas dore lagjet jo më larg se 5km vijë ajrore nga qendra.
Bashkia e Durrësit shpalli të hënën e shkuar një tender për depozitimin e mbetjeve të saj urbane, vetëm pak ditë pas finalizimit të projektit të mbështetur nga qeveria për dërgimin e mbetjeve drejt kompanisë koncesionare që menaxhon landfillin e Sharrës në Tiranë, të paktën për një periudhë 10-vjeçare.
Bashkia Durrës nuk do të paguajë për plehrat vetëm gjatë periudhës (gusht-dhjetor 2021), ndërsa më pas vit pas viti shuma varion nga:
34,465,920 lekë (për vitet 2022-2024), 10%
në 51,698,880 lekë (2025 – 2027), 15%
në 68,931,840 lekë (2028 – 2030). 20%
Deri në fund të periudhës 10-vjeçare të depozitimit të mbetjeve në landfillin e Sharrës, kostoja që tatimpaguesit durrsakë do të paguajnë nga xhepat e tyre për mbeturinat dyfishohet, ndërsa ulet fondi i akorduar nga Buxheti i Shtetit për menaxhimin e mbetjeve të Durrësit.
3 vitet e para qeveria ka marrë përsipër të paguajë 90% të shumës totale, në 3 vitet e mëpasme (2025 – 2027) 85% të shumës, ndërsa 3 vitet e fundit 80% të shumës totale.
Prej vitit të kaluar, kur qeveria mbylli venddepozitimin në Porto Romano për ta shndërruar në Eco Park, banorët e Durrësit janë përballur disa herë me emergjencat mjedisore për shkak të mos tërheqjes së mbeturinave urbane për ditë të tëra brenda në qytet dhe zona periferike. Alternativa e vetme që u ofrua për depozitimin e mbetjeve ishte landfilli i Sharrës, i cili prej mëse një viti i ka pranuar mbeturinat urbane pa pagesë.
Pavarësisht të gjithë vendimeve të marra, prej dy vitesh duket se situata mbetet e njëjtë në këtë qytet duke bërë që të mos i jepet zgjidhje nga asnjë organ.
