Si ministre e re në sektorin e Shëndetësisë, Albana Koçiu, i ka nisur abuzimet nga ushqimi i pacientëve. Në këtë muaj janë zhvilluar disa tenderë për ushqimet në spitale dhe të gjithë mbajnë “Flamurin e kuq” akorduar nga Open Data për risk të lartë korrupsioni. Në të njëjtën mënyrë po vepron Albana, edhe me tenderin e fundit.
Bëhet fjalë për prokurimin me objekt “Shërbim gatimi dhe shpërndarje ushqimi për mbulimin e nevojave emergjente, për Qendrën Spitalore Universitare Nënë Tereza”. Kjo kontratë është afatshkurtër dhe zgjat deri në 31 janar 2024. Për vetëm tre muaj furnizime të spitalit me bukë, djathë, reçel e fruta, ministrja Koçiu ka urdhëruar drejtoreshën e spitalit Albana Fico të vendosë mbi tryezë 880 milionë lekë.
Imagjinojeni sa do të jetë tenderit i ushqimeve për të gjithë vitin 2024. Sigurisht do të flitet me miliarda lekë, ndërsa pacientët vazhdojnë të ushqehen me vaktet që iu sjellin të afërmit e tyre.
Por, synimi i pathënë i ministres dhe i drejtoreshës nuk është mirëqenia e të sëmurëve, por të kënaqin oligarkët e shëndetësisë. Këtë herë radha për dhuratë i ka ardhur Alma Tafanit.
Në dokumente tregohet se vetëm firma “KPL sh.p.k.” ka paraqitur ofertë dhe është shpallur menjëherë fituese pa garë fare. Sipas dokumenteve, aksionet e kësaj kompanie rezultojnë në pronësi të Ramazan Trokës. Por në të vërtetë pas saj qëndrojnë themeluesit e vërtetë, bashkëshortët Nikolin Jaka dhe Alma Tafani.
Ata do të marrin 880 milionë lekë që t’u çojnë për tre muaj bukë e reçel pacientëve të shtruar në QSUT. Për vite vazhdon e njëjta gjendje, ndërsa tenderi vetëm rrit vlerën e fondit dhe shërbimi i lë të pakënaqur pacientët.
Afaristja e spitaleve
Kështu ndodh kur hyn në lojë afaristja e spitaleve Alma Tafani. Ajo po bën kërdinë me tendera që nga viti 2014, jo për shkak të numrit, por për shkak të vlerave që arrijnë deri në 1 milionë dollar një tender.
Tafani është gjithashtu administratore dhe pronare e kompanisë AgroAl & Global Services (AGS), e cila ka si objekt të veprimtarisë shërbim ushqimi, drejtim të restoranteve, bareve, hoteleve etj. Tafani ka gjithashtu edhe 50 % të aksioneve në kompaninë AGRO INTEXO, 100 % të aksioneve në kompaninë AgroAl International si dhe është pronare e ZEPA GROUP.
Alma Tafani ka marrë 1.2 miliardë lekë të vjetra tendera vetëm nga Bashkia e Tiranës për blerje qumështi, kosi, djathi dhe gjize. Këto para i ka marrë përmes tre tenderave. Ndërsa në Shëndetësi ka marrë edhe 4 koncensione, me vlerë mbi 2.3 miliardë lekë, duke mos kursyer as tenderat për të larë çarçafët.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post