Për herë të dytë brenda viti, kryetarja e Bashkisë Durrës, Emiriana Sako, po i dërgon fondet e bashkisë për llamba rruge dhe shtylla ndriçimi. Megjithëse qindra familje vazhdojë të banojnë me qira për shkak se mbetën të pastrehë nga tërmeti, bashkia nuk i ka në axhendë. Përparësia janë fasadat dhe llambat.
Këtë herë Sako ka hapur një tender të tillë me objekt ‘Rehabilitim i ndriçimit të akseve rrugore në qytetin e Durrësit’. Sipas dokumenteve do të blihen shtylla dhe kabuj për këtë qëllim. Fondi vazhdon të jetë i lartë, këtë herë do të hidhen 250 milionë lekë.
Tenderi është zhvilluar në qershor 2024, por ende nuk është publikuar ndonjë dokument se kush është zgjedhur fitues, pasi janë bërë dy denoncime në Komisionin e Prokurimeve Publike.
Më 7 korrik 2024 është administruar ankesa e parë nga operatorit ekonomik “ASI-2A CO” SHPK, në pronësi të Astrit Gjikondajt.
Në fakt Sako ka patur marrëdhënie të mirë me këtë biznesmen dhe shpesh i bënte tendera “dhuratë”. Tani qenka prishur marrëdhëniet dhe Gjikondaj po nxjerr të palarat komisionit të Sakos.
Nga shqyrtimi paraprak i ankesës së sipërcituar, u konstatua se objekti i ankesës lidhet me vendimmarrjen e Komisionit të Vlerësimit të Ofertave mbi skualifikimin e ofertës së paraqitur nga operatori ekonomik “ASI-2A CO” SHPK. Kjo e fundit ka paraqitur ofertë mjaft ekonomike, 180 milionë lekë, por është skualifikuar me argumentin se “nuk ka paraqitur deklaratë mbi mos angazhimin e kapaciteteve teknike në kontratat e tjera”.
Ligji për këto raste kërkon që AK të vërë në dijeni operatorët me ofertave të përshtatshme për mangësitë që kanë në dokumentacione.
Por, Sako ka patur tjetër plan këtë herë dhe ka vendosur ta skualifikojë menjëherë ofertën në fjalë.
Ndërkohë më datë 8 korrik 2024, nëpërmjet Sistemit të Ankesave Elektronike pranë Komisionit të Prokurimit Publik, është administruar ankimi elektronik e bashkimit të operatorëve ekonomikë “K.M.K” SHPK & “Caushi M” SHPK, me pronarë respektivë Kelmend Caushaj dhe Mehmet Caushaj.
Bashkimi i operatorëve ekonomikë “K.M.K” SHPK & “Caushi M” SHPK deklaron se është skualifikuar pa të drejtë. Zyrtarisht, arsyeja e heqjes është se nuk është dorëzuar “Deklaratë mbi mos angazhimin e kapaciteteve teknike në kontratat e tjera”.
Pra, është neglizhencë e përsëritur, pasi vetëm kështu Sako mund të vazhdonte me planin e saj, për t’i dhënë këtë tender firmës që po favorizon.
Dy denoncimet nxjerrin në sipërfaqe shkeljet e bëra, të cilat normalisht duhet të kapen dhe të hetohen nga Agjencia e Prokurimeve Publike, megjithatë nuk është vonë që KPP të thojë fjalën e vet për tenderin 250 milionë lekë të Emiriana Sakos.
Sako nuk dëgjon zërin e banorëve të pastrehë
Ky tender do të ishte më mirë të mos bëhej dhe të shtyhej edhe pak kohë ky “rinovim” shtyllash. Bashkia ka qytetarë që vuajnë për strehë dhe me këto para mund të mbaronte riparimi i ndonjë pallati të dëmtuar.
Në 20 shkurt 2024, banorët protestuan para bashkisë së Durrësit, duke kërkuar me insistim të takojnë kryetaren e bashkisë Emirjana Sako. Protesta u shoqërua me tension, pasi protestuesit u ndaluan të hyjnë në ambientet e bashkisë.
Në protestë morën pjesë dy kategori. Familjet e dëmtuara nga tërmeti, të cilat prej 10 muajsh nuk marrin bonusin e qirasë si dhe familje të pastreha të komunitetit rom e egjiptian. Në total janë 2500 familje të dëmtuara nga tërmeti që u ishte ndërprerë bonusi i qirasë dhe 100 familje rome egjiptiane të pastrehë.
Kujtojmë se kryetarja e Bashkisë Durrës, Emiriana Sako, u mor në pyetje për dy orë nga SPAK më 17 mars 2024. Pas daljes, ajo dha një prononcim të shkurtër për gazetarët ku tha se ishte thirrur për një çështje në hetim, por refuzoi të jepte më shumë detaje.
Po ashtu, kryetarja Sako është kallëzuar më parë në SPAK nga opozita, për përfshirjen e saj në aferën e inceneratorëve.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016
Discussion about this post