Dy ish-drejtues të UÇK u dënuan me burg, Haradinaj: S’janë brezi i parë që…

Ish krerët e UÇK, Hysni Gucati dhe Nasim Haradinaj janë dënuar me katër vite e gjysmë burgim dhe një gjobë prej 100 eurosh nga Gjykata e Hagës.

Ish kryeministri i Kosovës, Ramush Haradinaj, ka reaguar në Facebook pas vendimit të Gjykatës së Hagës, ndërsa shprehet se bashkëluftëtarët duhet të qëndrojnë të fortë pasi nuk janë brezi i parë që përballen me sfida të tilla. Më tej Haradinaj shprehet lufta për liri e shtet vazhdon.

Statusi:

Sot u dënuan krerët e OVL të UÇK-së, Hysni Gucati dhe Nasim Haradinaj.

Do i them pak fjalë për Nasimin.

Stërgjyshi i tij, Xhemajli i parë, pjesëmarrës në shumë luftëra kundër pushtuesve u vra në Gjakovë te kulla e Abdullah Pashë Drenit, në mbrojtje të Lidhjes së Prizrenit.

Gjyshi i tij, Xhemali i dytë, pjesëmarrës në të gjitha luftërat për liri. Bashkëshortja e tij, gjyshja e Nasimit, ishte bijë e Tishukëve, familje e njohur atdhetare në Dukagjin e Kosovë.

Babai i tij, Smajl Haradinaj, luftëtar i paepur për të drejtën e shqiptarëve, pjesëmarrës në lëvizjet antijugosllave dhe për bashkim me Shqipërinë, i burgosur politik mbi 20 vjet.

Nana Myzaqet, vëllau Naimi, motrat Shqipja e Naimja, bashkëshortja Xhejlanja, e veçanërisht vëllai i vogël Agroni që vuan nga një sëmundje e rëndë, e kuptojnë dhe e ndjejnë peshën e vendimit të sotëm, sepse nuk janë brezi i parë që përballohen me sfida të tilla.

Bashkëluftëtarë Hysni e Nasim, qëndroni të fortë. Lufta për liri e shtet vazhdon!