PD është shfaqur sërish e përçarë dje në Parlament, kur u votua përbërja e dy komisioneve të posaçme parlamentare për reformën zgjedhore dhe atë territoriale. Të dyja komisionet u votuan me 108 vota pro dhe 9 kundër. Sikur pritej, grupi i Alibeajt ka votuar pro përbërjes së dy komisioneve, ndërsa grupi i Berishës është pozicionuar kundër, pasi i konsiderojnë këto komisione një farsë.
Ndër të tjera evidentohet se kundër këtyre komisioneve kanë votuar Agron Gjekmarkaj dhe Tomor Alizoti, duke u bashkuar kështu me grupin e Berishës. Komisioni i reformës zgjedhore do të përbëhet nga 18 anëtarë, ku grupi i PS-së ka 9 anëtarë, ai i PD-së 6 anëtarë dhe anëtarët e tjerë janë Fatmir Mediu, Shpëtim Idrizi dhe Petrit Vasili.
Në të njëjtën përbërje do të jetë edhe Komisioni i Reformës Territoriale, ku 9 anëtarë janë të PS-së, 6 të PD-së, si dhe Vangjel Dule, Mesila Doda dhe Erisa Xhixho e LSI-së.
Discussion about this post