Erhun Obanori dhe Besir Iseni nuk do të jenë pjesë e ekipit të Tiranës. Obanori nuk u paraqit në stërvitjen e djeshme të ekipit dhe normalisht ka mbyllur para kohe bashkëpunimin me Tiranën.
Ndërkohë Iseni do të shohë një aventurë tjetër në Kosovë ose Maqedoni. Iseni është dënuar 24 muaj nga Disiplina për ngjarjet e ndodhura në kampionatin shqiptar, pikërisht në sfidën me Bylisin.
Skuadra e Tiranës po mbyll përgatitjet e fundit për pjesëmarrjen në Ligën e Konferencës.
Por për të motivuar edhe më shumë ekipin ka menduar presidenti i bardhebluve, Refik Halili, i cili ka zbritur personalisht në fushën e lojës.
Ai dje ka qenë i pranishëm në stërvitjen e bardhebluve, jo vetëm duke ndjekur nga afër atë, por edhe duke folur drejtpërdrejt me ekipin. Ashtu siç bën zakonisht numri 1 i bardhebluve, biseda me ekipin ka qenë gjatë seancës stërvitore, ku ai ka mbledhur lojtarët në fushën e lojës.
Në fjalimin e tij të shkurtër, ai ka kërkuar impenjimin maksimal për të kaluar turin e parë, që është objektivi minimal i skuadrës në këtë edicion. Para skuadrës ka folur edhe trajneri Orges Shehi. Dy drejtuesit për 20 minuta kanë diskutuar gjatë me skuadrën.
Discussion about this post