Dy lojtarët “rebelë” të Partizanit binden të qëndrojnë, rikthehen në ekipin e parë

Ka dritën në fund të tunelit për skuadrën e Partizanit. Dy futbollistët “rebelë” , Saliu Sembene dhe Maget Gueje janë rikthyer në ekipin e parë.

Sipas “Panorama Sport” pranë klubit të kuq bëjnë me dije se pas negociatash të gjata me dy lojtarët për të ulur gjakrat dhe për t’u sqaruar kushtet, më në fund dy senegalezët kanë arritur të binden dhe të mos këmbëngulin më për largimin, por të presin merkaton e radhës për largimin.

Deri atëherë ata do të stërviten me ekipin e parë dhe do të jenë një vlerë e shtuar për Colellën, që ka vuajtur edhe mungesën e alternativave, veçanërisht në mesfushë, ku Maget mund të bënte punë.

Siç dihet, prej muajsh dy lojtarët protestojnë në mënyra të ndryshme për t’u larguar, por nuk ia kanë dalë. Tashmë ata janë tërhequr dhe Partizani e ka pranuar këtë hap pas të tyrin.