Prokuroria e Posaçme ka konfirmuar zyrtarisht nisjen e hetimeve për Aeroportin Ndërkombëtar të Vlorës. Dy muaj pas fluturimit të parë certifikues për këtë koncesion të rëndësishëm, që do të jetë “porta e jugut”, hetimet janë në fazën paraprake.
“Prokuroria e Posaçme kundër Korrupsionit dhe Krimit të Organizuar ka regjistruar procedim penal në lidhje me kontratën koncensionare të Aeroportit të Vlorës. Ky procedim është në fazën e hetimeve paraprake”, ka njoftuar SPAK.
Zotërues i kësaj vepre të rëndësishme është kompania e biznesmenit shqiptar të Kosovës, Behgjet Pacolli, e quajtur “Mabco Constructions”. Sipas të dhënave të deklaruara në Qendrën Kombëtare të Binzesit, ajo zotëron 98% të aksioneve, 2% i ka kompania 2A Group SH.P.K.
Organi i akuzës është duke hetuar detajet teknike të marrëveshjes se Pacollit me shtetin shqiptar dhe kontratën për ndërtimin e VIA-s.
Sipas dokumenteve të bëra publike gjatë shpalljes së parë të garës, Qeveria shqiptare ka marrë përsipër që të garantojë riskun për fitimin e munguar të koncesionarit, duke i garantuar 138 milionë euro të ardhura për 10 vitet e para të operimit nga trafiku i pasagjerëve.
Fitimi nuk është parë i arsyeshëm të ndahet i barabartë mes palëve, por shteti do të marrë 50 për qind të të ardhurave vetëm nëse tejkalohet skenari optimist. Aeroporti Ndërkombëtar i Vlorës përfshin një investim 104 milionë euro dhe ka një sipërfaqe prej 309 hektarë.
Dy vite më parë, kompania e Behgjet Pacollit me bazë në Lugano, Zvicër ka nënshkruar një marrëveshje siguruese me Bankën Kombëtare Tregtare, si garanci për kontratën e kredisë në shumën 56.000.000 (pesedhjete e gjashte milion) euro.
Discussion about this post