Bashkëshortja e Koçi Selamajt, shqiptarit që vrau një mësuese në një park në Angli ka rrëfyer më shumë detaje rreth sjelljes së burrit të saj dhe frikën që së fundmi kishte për jetën.
Sipas dëshmisë së Ionela Gherghisan, javët e fundit ai ishte treguar shumë i dhunshëm duke arritur deri aty sa t’i vinte duart në fyt për ta mbytur dhe tentativa për të kryer marrëdhënie me të dy orë para krimit të rëndë.
“Ai u përpoq të bënte seks me mua në parkingun e një hoteli, por unë i thashë jo. Dy orë më vonë ai goditi Sabina Nessa”, ka thënë gruaja e tij.
45-vjeçarja tha se nuk e kishte imagjinuar kurrë që Selamaj, 36 vjeç, do të tentonte të kryente një krim kaq të tmerrshëm duke thënë se ishte mjaft e prekur nga ngjarja.
“Është shumë e vështirë për mua të gjej fjalët për t’i thënë familjes së Sabinës, sepse jam po aq e tronditur nga ajo që bëri ai sa edhe ata. Edhe unë kam një vajzë 26-vjeçare dhe e ndjej dhimbjen e tyre. Kam shumë dhimbje në zemër dhe ndihem shumë e vetmuar. Më vjen shumë keq që kaq shumë njerëz u lënduan për shkak të tij. Nuk e kam besuar kurrë se ai ishte në gjendje të vriste”, u shpreh ajo.
Gherghisan, pastruese dhe kërcimtare me kohë të pjesshme, tha se Selamaj ndryshoi dhe u bë i dhunshëm në javët para vrasjes dhe se ishte e tronditur nga dhuna ekstreme e ushtruar ndaj Nessas.
Discussion about this post