Vetëm një ditë pasi zv.ministrja e Shëndetësisë, Mira Rakacolli njoftoi se në vend janë zbuluar dy raste me variantin e Omicron në Shqipëri, mediat greke kanë shkruar një artikull për këtë çështjeje.
Sipas CNN.gr, varianti i ri i virusit ka “pushtuar” Shqipërinë, edhe pse për momentin janë vetëm dy raste të konfirmuara. Mediat citojnë konferencën e djeshme të Komitetit Teknik të Ekspertëve, që dha edhe lajmin e konfirmimit të dy rasteve të para me Omicron në vendin tonë.
“Zëvendësministrja e Shëndetësisë dhe kryetarja e komisionit, Mira Rakacoli, gjatë një konference për shtyp siguroi se për momentin, përhapja epidemiologjike në vend mbetet i qëndrueshëm. Eugena Tomini, drejtoreshë e Institutit të Shëndetit Publik, theksoi se varianti Delta vazhdon të jetë dominues. Përfaqësuesit e Komitetit u bënë thirrje qytetarëve që të vaksinohen për COVID-19, duke kujtuar se të gjithë ata mbi 18 vjeç kanë të drejtë të marrin një dozë përforcuese nëse e kanë marrë të dytën gjashtë muaj më parë. Sipas epidemiologes Silva Bino, përqindja e popullsisë që është vaksinuar është 40% , pasi ka pasur një rritje të vogël në dy javët e fundit. Ministria shqiptare e Shëndetësisë tha dje se në 24 orët e fundit janë konfirmuar 343 raste me SARS-CoV-2. Numri i përgjithshëm i infeksioneve të regjistruara arriti në 206,616; numri zyrtar i vdekjeve ishte 3,180”, thuhet në artikullin e cnn.gr.
Ditën e djeshme Komiteti i Ekspertëve deklaroi se masat anti-Covid do të jenë të njëjta me përjashtim të natës së ndërrimit të viteve, ku nuk do të ketë orë policore.
Discussion about this post