Italia dhe Polonia kanë marrë masa të reja kundër përhapjes së koronavirusit. Përderisa Italia do të vendosë testim të detyrueshëm për vendet tjera të BE-së nga 16 dhjetori, Polonia e kufizoi numrin maksimal të njerëzve në restorante. Në Itali, përpos kërkesës për testim, autoritetet do të kërkojnë edhe karantimin 5-ditor për personat e pavaksinuar, raporton agjencia AFP. Masat e reja do të jenë në fuqi deri në fund të janarit dhe po merren në kohën kur Evropa po përballet me valë të re të infeksioneve me ardhjen e dimrit dhe përhapjen e variantit Omicron. Italia ishte shteti i parë i BE-së që kishte përjetuar përhapje të madhe të koronavirusit në fillim të pandemisë. Muajve të fundit, vendi është përpjekur që ta kontrollojë gjendjen përmes pasaportave shëndetësore, me të cilat dëshmohet vaksinimi, shërimi ose testi me rezultat negativ.
Në Poloni, Ministria e Shëndetësisë të mërkurën raportoi 660 të vdekur nga Covid-19 për 24 orë. Kjo është shifra më e lartë ditore e viktimave që nga prilli. Ministria tha se do të donte që vaksinimin ta bënte të detyrueshëm për punëtorët shëndetësorë, mësimdhënësit dhe ushtarët nga 1 marsi, por kabineti është i përçarë për këtë çështje.
Discussion about this post