Situata e krijuar në Partinë Demokratike pas humbjes së zgjedhjeve të 6 Marsit, nuk duket e qetë. Pasi shumë deputetë i kërkuan dorëheqjen, kreu i demokratëve siç duket nuk do ta bëjë një gjë të tillë. Lulzim Basha dhe disa deputetë mbështetës të tij kanë kushtëzuar tërheqjen e tij me tërheqjen e Berishës nga kandidimi për në krye të PD-së, gjë që duket se do të vijojë t’i mbajë të dy në lojë në një kohë kur pjesa më e madhe e grupit parlamentar i kërkuan sot largimin.
Basha u shpreh sot se nuk mund të bëhej kokë turku, por se ishte i gatshëm të ofrohej për çdo zgjidhje të mundshme, megjithatë nuk foli për ikje. Në këtë mënyrë, pavarësisht kërkesës së deputetëve në Grupin Parlamentar të PD-së, për aq kohë sa edhe Berisha nuk tërhiqet, Lulzim Basha vijon të jetë në krye të demokratëve.
Por cili është skenari i deputetëve të PD-së tani?
Burime bëjnë me dije se skenari i parë dhe më i arritshmi në kohë të shkurtër është përjashtimi i Bashës nga Grupi Parlamentar i PD-së. Mjafton që të bëhet më shumë se gjysma e grupit që kërkojnë këtë dhe përmes një letre njoftojnë kryetaren e Kuvendit për vendimin e marrë duke bërë që kryetari të mos jetë në pjesë e Grupit Parlamentar të PD-së.
Ka edhe një skenar tjetër, i cili duket më i pamundur për shkak edhe të faktit se partia duket tejet e demoralizuar. Ai është mbledhja e Kuvendit dhe kërkesa për shkarkimin e kryetarit të demokratëve dhe zgjedhja e një kryetari të ri.
Discussion about this post