Dy shtetas shqiptarë janë ekstraduar drejt vendit, njëri nga Italia dhe tjetri nga Gjermania, pas kërkesës së autoriteteve shqiptare për veprat penale që u ngarkohen.
Nga Italia u ekstradua Amarildo Luca, 29 vjeç, lindur në Dibër, i cili ishte shpallur në kërkim nga Gjykata e Shkallës së Parë për Korrupsionin dhe Krimin e Organizuar. Ai akuzohet për veprën penale “Ndihma për kalim të paligjshëm të kufijve”, kryer në bashkëpunim.
Sipas hetimeve, gjatë periudhës 2022-2024, A. L. ka ndihmuar shtetas të ndryshëm për të kaluar ilegalisht kufijtë drejt Mbretërisë së Bashkuar, ShBA-së dhe Kanadasë. Për këtë vepër, ndaj tij ishte caktuar masa e sigurisë “Arrest në burg”.
Nga Gjermania u ekstradua Francesko Berisha, 20 vjeç, lindur në Tiranë, i cili ishte dënuar dy herë nga Gjykata e Tiranës për veprën penale “Vjedhja” – përkatësisht me 8 muaj burg në vitin 2021 dhe 6 muaj në vitin 2024.
Policia e Shtetit dhe Interpol Tirana theksojnë angazhimin për të sjellë përpara drejtësisë çdo shtetas që përpiqet t’i shmanget ligjit, pavarësisht vendndodhjes së tij.
Discussion about this post