Partizani ka mbyllur ditën e djeshme përgatitjet për ndeshjen ndaj Bylisit, shumë vendimtare për situatën që të kuqtë ndodhen.
Pas dy humbjeve me Laçin dhe Egnatian, duhet me patjetër reagimi. Gjithashtu luhet për herë të parë një ndeshje e niveleve të tilla në stadiumin e ri dhe në këtë drejtim, fitorja është më shumë se detyrë.
Përtej jehonës që kanë bërë punimet në stadium gjatë këtyre ditëve, te Partizani ka plot probleme për sa u përket dëmtimeve.
MUNGESAT
Masanga Matondo ka një dëmtim serioz në gju dhe e ka të pamundur të jetë i gatshëm për ndeshjen e sotme, madje ka dyshime nëse do të arrijë të rikthehet në dhjetor, kur rinis Superiorja.
Viktor da Silva gjithashtu nuk do të arrijë të luajë as në këtë ndeshje, pasi dëmtimi i pësuar në ndeshjen ndaj Egnatias nuk është rikuperuar ende.
As Bruno Telushi nuk ia ka dalë të rikuperohet në kohë, duke e çuar në tre numrin e lojtarëve të padisponueshëm në këtë ndeshje.
FORMACIONI
Lajmi i mirë i vetëm për Kolelën para kësaj ndeshjeje është rikthimi i Valentino Muratajt, titullar absolut që kur skuadrën e ka marrë në drejtim italiani.
Në portë për këtë betejë do të jetë Bekim Rexhepi, ndërkohë që mbrojtja përbëhet nga emrat e zakonshëm në këtë sezon.
Hadroj dhe Buxhelaj do të jenë të vendosur në krahë, ndërsa në qendër Bitri dhe Sota kanë ndërtuar një partneritet mjaft frytdhënës në këtë sezon.
Në mesfushë të sigurt janë Rrapaj dhe Murataj, teksa mbetet për t’u parë kush tjetër do të luajë në këtë repart. Duke parë ndeshjet e shkuara, me shumë mundësi nga minuta e parë pritet Xhafer Hodo.
Tridenti i sulmit pritet të përbëhet nga Cara, Hoti dhe Skuka.
Discussion about this post