Interi ka zhvilluar sot në stadiumin Ataturk të Stambollit stërvitjen e fundit në impiantin ku do të zhvillohet finalja e UEFA Champions League ndaj Manchester City.
Një stërvitje që zakonisht shërben për pak gjëra, pasi trajnerët e kanë në mendje formacionin që kanë planifikuar.
Por futbollistët zikaltër nuk janë kursyer ndaj njëri-tjetrit, teksa ka pasur edhe një përplasje mes Dimarco dhe Robin Gosens. Gjatë seancës stërvitore, gjermani i bëri një ndërhyrje të ashpër ish-lojtarit të Parmës pranë portës.
Stafi teknik që luante rolin e gjyqtarëve, nuk sinjalizoi penallti duke acaruar edhe më shumë italianin i cili protestoi fillimisht ndaj tyre, e më pas iu kthye Robinit për ndërhyrjen e ashpër, pasi mund ta kishte dëmtuar vetëm 24 orë para ndeshjes së madhe.
Megjithatë, ndeshja rifilloi dhe lojtarët u sqaruan “në ecje e sipër” me njëri-tjetrin, duke mbyllur shpejt debatin mes tyre, pa lejuar që situata të tensionohej më shumë.
Discussion about this post