Dy vëllezërit dhunojnë efektivin brenda komisariatit në Shkodër (Emrat)

Dy shtetas, vëllezërit Marjan Doçi dhe Mateo Doçi kanë goditur një efektiv të forcave “Shqiponja” brenda mjediseve të policisë së Shkodrës duke i qëlluar me grusht.

Mësohet se vëllezërit janë futur me forca brenda oborrit të policisë dhe kanë goditur efektivin.

Ngjarja ka ndodhur pasi policia ka ndalur në rrugë një automjet për kontroll rreth orës 14:00 të mesditës së 29 shtatorit, por 2 personat që ndodheshin brenda kanë kundështuar efektivët e “Shqiponja” duke mos iu bindur dhe më pas janë shoqëruar në komisariat.

Pas shoqërimit të dy personave në Komisariat, në Policinë e Shkodrës kanë mbërritur vëllezërit Marjan dhe Mateo Doçi duke qenë se automjeti i ndaluar ishte i tyre.

Ata janë njoftuar nga dy personat që ndodheshin në automjet për ndalimin nga ana e policisë.

Vëllezërit kanë kërkuar që automojeti të nxirrej me forcë nga mjediset e komisariatit dhe janë konfliktuar edhe me një efektiv të Shqiponjave duke e goditur me grusht.

Pas kësaj ngjarje forcat e policisë kanë arrestuar dy vëllezërit Doçi, të cilët janë të dyshuar për veprën penale “goditje për shkak të detyrës” dhe “kundërshtim i forcave të policisë”.

Policia po heton për zbardhjen e plotë të kësaj ngjarje të ndodhur në Shkodër.

Njoftimi i policisë:

Vihen në pranga 2 vëllezër pasi kundërshtuan me forcë dhe ushtruan dhunë ndaj punonjësve të Policisë të Forcës së Posaçme “Shqiponja”.

Procedohet penalisht dhe një 19-vjeçar, për mosbindje ndaj urdhrit të punonjësit të Policisë.

Gjatë patrullimit të zakonshëm në sheshin “Prek Cali”, punonjësit e Policisë të Forcës së Posaçme “Shqiponja” kanë konstatuar një automjet dhe i kanë bërë me shenjë që të ndalonte, për të ushtruar kontroll për sende të kundërligjshme. Automjeti drejtohej nga shtetasi E. L., 19 vjeç.

Gjatë kontrollit fizik ndaj 19-vjeçarit, ky shtetas ka tentuar të largohet me vrap, por është kapur dhe ndaluar nga shërbimet e Forcës së Posaçme “Shqiponja”.

Në momentin e shoqërimit të automjetit, shërbimet e Policisë janë kundërshtuar me forcë nga shtetasit M. D., 29 vjeç dhe M. M. alias M. D., 38 vjeç (vellezër), të cilët kanë kryer veprime të dhunshme gjatë shoqërimit të automjetit dhe në ambientet e brendshme të Drejtorisë Vendore.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Shkodër, për veprime të mëtejshme.