Dy vite nga shembja e Teatrit Kombëtar, ish kreu i Partisë Demokratike Lulzim Basha ka shpërndarë një mesazh në rrjetet sociale. Në një postim në Facebook, Basha shkruan se vendi është marrë peng prej 9 vitesh, ndërsa shton se Teatri duhet të ndërtohet aty ku ishte dhe ashtu siç ishte.
Ndër të tjera, ai kujton vendimin e Gjykatës Kushtetuese që rrëzoi qeverinë për vendimin e shembjes së Teatrit duke e cilësuar si antikushtetuese dhe bën thirrje që drejtësia t’i shkojë deri në fund.
“Prej dy vitesh teatri është një plagë e hapur në zemër të Tiranës. Një plagë që sëmbon prej mos arsyeve që e shkaktuan atë dhe që janë të njëjtat me ato që e kanë mbajtur peng vendin këto 9 vite: arroganca, korrupsioni, klientelizmi, paratë e krimit dhe armiqësia e verbër ndaj trashëgimisë kulturore. Sot ai shesh, i zhveshur dhunshëm nga historia e tij, është një tjetër vijë ndarëse midis qytetarëve që duan një Shqipëri demokratike dhe një pakice që shkatërron, plaçkit, uzurpon një nga institucionet më të shenjta të kombit. Mirënjohje të thellë për artistët, qytetarët dhe qendrestarët që nuk u pajtuan kurrë me marrëzinë e një regjimi që dialogun e kryen me fadroma dhe dhunë shtetërore. Gjykata Kushtetuese provoi se beteja në mbrojtje të Teatrit Kombëtar ishte e drejtë dhe tani është koha që drejtësia të shkojë deri në fund, duke nxjerrë përpara përgjegjësive ata që barbarisht sulmuan kulturën, qytetarinë dhe trashëgiminë tonë të përbashkët”, shkruan Basha.
Discussion about this post